जुम्ला : मुगु जिल्ला अदालत न्यायधीशबिहीन भएको आठ महिना भएको छ । न्यायधीश नहुँदा फैसला भइहाल्नुपर्ने १६ मुद्दा रोकिएका छन् । गत मंसिरमा जिल्ला अदालतका न्यायधीश रोमनाथ अधिकारी गएपछि अहिलेसम्म न्यायाधीश आएका छैनन् ।
लामो समय न्यायधीश नभएको भन्दै गुनासो बढ्न थालेको छ । लामो समय न्यायाधीश नभएपछि सुर्खेत उच्च अदालतले काजमा प्रलातकुमारी गिरीलाई खटाएको थियो । उनी चैत्रमा लकडाउन भएको कारण देखाउँदै नआएपछि जिल्ला आठ महिनादेखि न्यायधीशबिहीन भएको अदालतकी श्रेस्तेदार निर्मलाकुमारी खड्काले जानकारी दिइन् ।
कर्णाली क्षेत्रमा खटिएका न्यायधीश दुई तीन महिना भन्दा बस्दैनन् । यो पटक भने लामो समय अदालत न्यायधीबिहीन भएको हो ।
न्यायधीश माग्दै बार एसोसिएसन
अदालत खरिदार र सुब्बाको भरमा चलिरहेको भन्दै बार एसोसिएसन, कर्णलीले प्रधानन्यायधीशसँग न्यायधीश माग्ने निर्णय गरेको छ । नेपाल बार एसोसिएसनका केन्द्रीय उपाध्यक्ष मिनबहादुर महतले नेपालको संविधानले न्यायधीश बिनाको अदालत परिकल्पना नगरेको बताए ।
न्यायधीश लामो समय नभएको महसुस भएपछि कर्णालीका कानुन व्यवसायीले प्रधानन्यायधीशसँग जिल्ला न्यायधीशको माग गर्ने निर्णय गरेको उनले सुनाए ।
निर्णयमा नेपाल बार निवर्तमान केन्द्रीय सदस्य पदमबहादुर शाही, अधिवक्ता नन्दबहादुर खत्री, अधिवक्ता अनिता तिमिल्सिना, अधिवक्ता खेमराज न्यौपाने, अधिवक्त अमल राज शाहीसहितको संयुक्त टोलीले लिल्लामा न्यायधीश माग गर्न पहल गर्ने उल्लेख छ ।
कैदी राख्न अर्को जिल्लामा
मुगु जिल्ला कारागार निमार्ण सुरु भएको सात वर्ष भइसकेको छ । तर भवन भने अहिलेसम्म पनि बन्न सकेको छैन । महिला कैदी भवन प्रहिरी पोष्ट निमार्ण भए पनि पुरुष कैदी राख्ने भवन नहुँदा कैदी राख्न दुई दिन पैदल हिँडेर जुम्ला पठाउनुपर्छ ।
केही कैदीलाई बाँकेमा पठाउनु पर्ने बाध्यता भएको मुगुका डीएसपी भुवनेश्वरप्रसाद शाहले जानकारी दिए । अहिले जुम्ला कारागारमा १ महिला र १६ पुरुष गरी १७ कैदी छन् । कैदीलाई तत्काल अदालतमा हाजिर गराउनुपर्दा चार दिन समय लाग्ने बाध्यता मुगु जिल्ला प्रहरीमा रहेको छ ।
प्रतिक्रिया दिनुहोस !
