गाउँपालिका अध्यक्षमाथि हातपात र तोडफोड गरेको आरोपमा १३ जना पक्राउ
असार ३१, २०७७ बुधबार १२:९:०
ओखलढुंगा : लिखु गाउँपालिकाका अध्यक्ष गोविन्दबहादुर पौडेललगायत जनप्रतिनिधि र कर्मचारीलाई अभद्र व्यवहार गरेको आरोपमा १३ जना पक्राउ परेका छन् । पक्राउ पर्नेहरु सोही गाउँपालिका वडा नं ४ का रहेका छन् ।
लिखु गाउँपालिका वडा नं ४ का ३१ वर्षीय दीपक बस्नेत, ३२ वर्षीया भारती मगर, २२ वर्षीया निर्मला थापा, २२ वर्षीया दीपक थापा, २२ वर्षीय दीपेन्द्र खड्का, २० वर्षीय विश्वास खत्री पक्राउ परेका हुन् । त्यसैगरी पक्राउ पर्ने अन्यमा २७ वर्षीय पारस खड्का, २७ वर्षीय अरुण कार्की, ३० वर्षीय दलबहादुर थापा, २७ वर्षीय निलबहादुर कार्की, २० वर्षीय राजु कार्की, २४ वर्षीय लक्ष्मण कार्की र २१ वर्षीय दीपराज खड्का रहेका छन् ।
उनीहरुलाई जिल्ला प्रहरी कार्यालय ओखलढुंगाले पक्राउ गरेको हो । लिखु गाउँपालिका गाउँ कार्यपालिका सदस्य मावर सुनुवारले दिएको उजुरीका आधारमा उनीहरुलाई पक्राउ गरिएको प्रहरीले जनाएको छ ।
गाउँपालिकाका जनप्रतिनिधि र कर्मचारीमाथि हातपात गरेको, गाउँपालिकाको प्रशासनिक भवन तोडफोड गरेको, भौतिक संरचनामा क्षति पुर्याएको भनी उजुरी परेको जिल्ला प्रहरी कार्यालयका प्रहरी नायब उपरीक्षक रुपेश खड्काले जानकारी दिए। गत असार ११ गते भएको लिखु गाउँपालिकाको एम्बुलेन्स दुर्घटनाको विषय र स्वास्थ्य चौकी स्तरोन्नतिको विषयमा विवाद बढेको भएको थियो । सोही विवादमा सो घटना भएको बताइएको छ ।
एम्बुलेन्स दुर्घटनाको विषयमा ४ दिनपछि गाउँपालिकाले दुःख व्यक्त गर्दै समवेदना पत्र सार्वजनिक गरेको थियो । तर लिखु गाउँपालिकाले हातपात र तोडफोडको घटनाबारेमा आधिकारिक धारणा अहिलेसम्म सावर्जनिक गरेको छैन । घटनालगत्तै नेकपाको लिखु गाउँपालिका कमिटीले प्रेस विज्ञप्ति निकालेर घटनाको भर्त्सना गरेको थियो ।
कमिटीले निकालेको विज्ञप्तिमा लिखु गाउँपालिकाको कार्यकक्षमा नियमित काम चलिरहेको बेला हातमा बाँसका भाटा तथा फलामे रड लिई पालिकाको गेट तोड्दै, कुर्सी भाँच्दै, सिसाको झ्याल फुटाउँदै पालिका अध्यक्ष गोविन्दबहादुर पौडेल, अन्य जनप्रतिनिधिहरु, कर्मचारीवर्गहरु समेतलाई त्रसित बनाइ कानुन हातमा लिइ हातपात, लछारपछार तथा कुटपिट गरी अराजक शैलीमा र कानुनी राज्यको बर्खीलाप गर्ने गतिविधि देखाएको प्रति ध्यानाकर्षण भएको उल्लेख गरिएको छ ।
खतिवडाको आपत्ति
लिखु घटनाको विषयलाई लिएर गरिएको पक्राउप्रति कांग्रेस नेता रामहरि खतिवडाले आपत्ति जनाएका छन् । जनताको मन जितेर काम गर्नुपर्नेमा जनतालाई आतंकित बनाउने काम गरिएको भन्दै उनले भर्त्सना गरेका छन् ।
आफूले काम गर्न नसकेपछि त्यसको जिम्मेवार अरुलाई ठहराउनु मुखर्ता हो’ नेता खतिवडाले भने, ‘पक्राउ परेकाहरुलाई मुद्दाको रुपमा नलिई स्थानीयस्तरमै मिलाउन म अनुरोध गर्छु।’
उनले जनताको सवालमा राजनीतिक प्रतिशोध नसाँध्न समेत आग्रह गरेका छन् । साथै उनीरुलाई तुरुन्त रिहा गर्न समेत अनुरोध गरेका छन् ।
प्रतिक्रिया दिनुहोस !
