ओखलढुंगाः जिल्ला प्रशासन कार्यालय ओखलढुंगाले जिल्लाको प्रशासन सुधार वार्षिक कार्य योजना तयार गरेको छ । आर्थिक वर्ष २०७७/०७८ का लागि कार्यालयले ५४ बुँदे कार्ययोजना तयार पारेको हो ।
सेवा प्रवाह पारदर्शी र प्रभावकारी बनाउन कार्ययोजना आवश्यक रहेको कार्यालयले जनाएको छ । प्रशासन कार्यालयबाट प्रवाह हुने शान्ति सुरक्षा, अपराध नियन्त्रण, विपद व्यवस्थापन, सुशासनलगायतका सेवाहरुलाई व्यावसायिक रुपमा सम्पादन गर्ने उद्देश्यले कार्ययोजना तर्जुमा गरिएको प्रमुख जिल्ला अधिकारी कृष्ण पौडेलले बताए ।
कार्ययोजनामा जनमैत्री कार्यालय व्यवस्थापन, सुशासन तथा प्रभावकारी सेवा व्यवस्थापन, शान्ति सुरक्षा र अपराध नियन्त्रण, विपद् व्यवस्थापनलगायतका विषय समेटिएका छन् ।
कार्ययोजना तर्जुमा गर्दा प्रशासन कार्यालयले कार्यालयलाई प्राप्त कानुनी अधिकार, स्वीकृत वार्षिक विकास कार्यक्रम तथा वजेट, नेपाल सरकार तथा प्रदेश सरकारवाट प्राप्त निर्देशन, गृह सचिव र प्रमुख जिल्ला अधिकारीविच भएको कार्यसम्पादन करार सम्झौता तथा स्थानीय वस्तुस्थिति समेतलाई आधार बनाइएको छ ।
यस्तो कार्ययोजनाले कामको मूल्यांकन तथा सुधारका लागि पनि उपयोगी हुने प्रजिअ पौडेलको भनाइ छ । यस्तै, जिल्लास्थित सबै सरकारी कार्यालयको समेत कार्ययोजना निर्माण भइरहेको प्रशासन कार्यालयले जनाएको छ।
कार्यालयले २०७७ साउन मसान्तभित्रमा सबै सरकारी कार्यालयको सुधार योजना तर्जुमा तथा कार्यान्वयन गर्ने गरी तयारी गरिरहेको जनाएको छ ।
प्रतिक्रिया दिनुहोस !
