काठमाडौँ : विज्ञानका विषयगत प्रतिभा पहिचान गर्ने अन्तर्राष्ट्रिय ओलम्पियाडबारे जानकारी गराउने र प्रतियोगितामा विद्यार्थी सहभागिताको लागि दायरा बढाउने अभियानअन्तर्गत स्टेम फाउन्डेसन नेपालले सातै प्रदेशमा पहिलो डिजिटल सेमिनार आयोजना गर्ने भएको छ ।
'फर्स्ट डिजिटल सेमिनार अन इन्टरनेशनल ओलम्पियाड्स' नाम दिइएको यस कार्यक्रममा नेपाल विज्ञान तथा प्रविधि प्रतिष्ठान (नास्ट) को सहकार्य रहनेछ । साथै नेपाल सरकार, शिक्षा विज्ञान तथा प्रविधि मन्त्रालयको सहजीकरणमा सेमिनारलाई सातै प्रदेशमा आयोजना गरिने भएको छ।
विज्ञान शिक्षक समाज नेपाल, त्रि.वि. विज्ञान अनुसन्धान केन्द्र, युनिग्लोब कलेज, विरिन्ची कलेज, प्याब्सन, एन-प्याब्सन, एभरेस्ट वर्ल्ड स्कुल गरी ७ वटा विभिन्न संघ संस्थासँगको सहकार्यमा देशभर सातै प्रदेशमा एक-एक दिने सेमिनारको आयोजना गरिने भएको हो।
रजिष्टर गर्नको लागि स्टेम फाउन्डेशन नेपालको वेवसाइट तथा फेसबुक पेजमा रजिस्ट्रेसन लिंक उपलब्ध छ । साउन २६ गते प्रदेश १ बाट हुने सेमिनार साउन ३० गते प्रदेश २ मा, साउन ३२ गते गण्डकी प्रदेशमा, भदौ २ गते प्रदेश ५ मा, भदौ ४ गते कर्णाली प्रदेशमा, भदौ ७ गते सुदूरपश्चिम प्रदेशमा सेमिनार आयोजना हुनेछ । बागमती प्रदेशमा भने साउन १५ गते नै सेमिनार समापन भइसकेको छ ।
यस सेमिनारमा नेपाल सरकार, शिक्षा विज्ञान तथा प्रविधिमन्त्री गिरीराजमाणि पोखरेल, नेपालमा ओलम्पियाडका एम्बेसडर पूर्वविज्ञानमन्त्री गणेश साह, ओलम्पियाडमा नेपाललाई पहिलो पटक अन्तर्राष्ट्रिय मञ्चमा सहभागी गराउने प्राध्यापक तथा विज्ञको पनि सहभागिता रहनेछ ।
प्रतिक्रिया दिनुहोस !
