इटहरी : सप्तकोशी नदीको बाढी र कटानको कारण जोखिममा रहेको बराहक्षेत्र नगरपालिका पछिल्लो समय साना खोलाहरुकै कारण जलमग्न हुन थालेको छ । बढ्दो सहरीकरण, सडक निर्माण तथा विभिन्न भौतिक संरचना निर्माणले पानी जम्दा बाढीको रुप लिन थालेको स्थानीय बाबुराम कार्कीले बताए । ‘पहिला कहिल्यै नदेखिएको बाढी यो वर्ष देखिएको छ,’ उनले भने ।
बराहक्षेत्रको २, ५, ६, ७, ८ वडा हरुमा डुबानले बढी असर गरेको छ । बराहक्षेत्रको गहने खोलाको बाढी यो पटक वस्ती पसेको छ । वडा नं. २, ६, ७ र ८ हुँदै बग्ने खोलाको बाढीले धानबाली डुबाउनुका साथै केही घरहरु डुबाएको छ ।
बराहक्षेत्र–६ का कृषक ज्ञानबहादुर कटुवालको एक विगाह खेत डुबानमा पर्यो । नगरपालिकालाई पानीको निकास गरिदिन एक महिना अगाडि १२५ जनाको संयुक्त निवेदन दिएपनि सुनुवाई नहुँदा घर खेत डुबेको उनी बताउछन् ।
गहने खोलामा कल्भर्ट हालेपछि पानी छरिएर बग्न नपाउँदा क्षति भएको उनको भनाइ छ । बराहक्षेत्र–७ की चित्रकुमारी कार्कीको खेतमा लगाएको धानबाली बालुवाले पुरिदियो । ‘पसाउने बेलाको धान मासियो,’ उनले भनिन्, ‘प्रत्येक वर्ष अलिअलि बाढी आउँथ्यो, यो पटक त अति नै ग¥यो।’
बराहक्षेत्र ५ कालाबन्जारका प्रायः घरहरु यो वर्ष डुबेका छन् । जंगल टोल, उराँव टोललगायतका क्षेत्र जलमग्न हुँदा घरहरु डुबेका छन् । खोला मिचेर घरहरु बन्न थालेपछि खोला बस्ती पसेको हो ।
स्थानीय अमित अधिकारीको हार्डवेयर पसलमा बाढी पसेर पाँच लाख रुपैयाँ बढीको क्षति भयो। ‘यसअघि पसल डुबाउने गरी कहिल्यै बाढी आएको थिएन,’ उनले भने, ‘बाटो र ढल निकास सही नहुँदा यस्तो भयो ।’
बराहक्षेत्र ६ र ७ पनि डुबेको छ ।
बराहक्षेत्रमा रहेको २ हजार ८ सय हेक्टर खेति योग्य जमिनमध्ये ८५ प्रतिशतमा धान खेती हुने गरेको नगरपालिकाको कृषि शाखाले जानकारी दिएको छ । नगर कृषि शाखाले डुबानले क्षति भएको धान बालीको स्थलगत अनुगमनसमेत गरेको छ ।बराहक्षेत्र नगरपालिकाकी उपमेयर कमला मगरले बाढीले बाढीले प्रभावित क्षेत्रहरुको सूची तयार पारी योजना बनाउन थालेको जानकारी दिइन् ।
प्रतिक्रिया दिनुहोस !
