दाङ : दाङमा एक कोरोना संक्रमितको होम आइसोलेसनमै मृत्यु भएको छ । लमही नगरपालिका–५ का ४३ वर्षीय पुरुषको मंगलबार बिहान घरमै मृत्यु भएको लमही नगरपालिका स्वास्थ्य शाखा अधिकृत लोकराज पौडेलले जानकारी दिए।
उनी जन्डिसको बिरामी भएको बुझिएको उनले जानकारी दिएका छन् । गएको असोज १ गते कोरोना परीक्षण गर्दा उनी र उनको श्रीमतीमा संक्रमण पुष्टि भएको थियो । संक्रमण देखिएपछि श्रीमान–श्रीमती होम आइसोलेसनमा बस्दै आएका थिए ।
उनको शव व्यवस्थापन गर्ने तयारी भइरहेको छ । यो सँगै जिल्लामै कोरोना संक्रमितको मृत्यु हुनेको संख्या तीन पुगेको छ । यसअघि कोरोना विशेष अस्पताल बेलझुण्डीमा रुपन्देहीका एकजना कोरोना संक्रमितको उपचारकै क्रममा निधन भएको थियो भने घोराहीमा बेवारिसे फेला परेको शवको कोरोना परीक्षण गर्दा रिपोर्ट पोजिटिभ आएको थियो ।
प्रतिक्रिया दिनुहोस !
