बढ्दै माघीको माहोल: रुपन्देहीका विभिन्न ठाउँमा माघी महोत्सव

भैरहवा : तराई क्षेत्रमा बसोवास गर्दैआएका आदिवासी थारु समुदायले परिवारमा मनाउँदै आएको माघी महोत्सव पछिल्लो समय महोत्सव आयोजना गरेरै समुदायको साथमा मनाउन थालेका छन् । जसले गर्दा यस पर्वको रौनक बढ्दै गएको छ ।

माघी एवं खिचडी पर्व थारु सामुदायको ठूला पर्व मानिन्छ । यस समुदायमा माघ १ गतेको दिनबाट महिनाभरी नै यो महोत्वस मनाउने गरिन्छ । थारु समुदायले प्रत्येक वर्षको माघ १ गतेलाई नयाँ वर्षको पहिलो दिनको रुपमा समेत लिन्छन् । यस पटक रुपन्देहीको विभिन्न स्थानमा महोत्वस आयोजना गरेर माघी पर्व मनाइने भएको छ ।

‘हम्मन संस्कृति, हम्मन पहिचान, सम्बर्द्धन कयना हम्मन अभियान’ नारासहित ओमसतिया सांस्कृतिक युवा क्लबले ओमसतियाको हाटी फर्साटिकरमा दोस्रो खिचडी महोत्सव एवं सांस्कृति कार्यक्रम आयोजना गरेको छ । जसमा थारु कलाको प्रर्दशनी, थारु सांस्कृतिक नाच, झुमरा नाच, झमटा नाच, लाठी नाचका साथी स्थानीय कलाकारको प्रस्तूति रहेको क्लबका सल्लहाकार दिलबहादुर चौधरीले बताए ।

थारु कला, संस्कृति र पहिचानको संरक्षण एवं प्रवर्द्धन गर्ने उद्देश्यले महोत्सव आयोजना गरिएको उनले बताए । उनका अनुसार महोत्सवमा मनोरञ्जन दिनुका साथै थारु खानाहरु घोंगी, खिचडी, माछा, ढिकरीलगायतको स्वाद समेत चखाइने छ ।

महोत्सवमा थारु संस्कृति झल्कने गरी विभिन्न समाग्रीसँगै पोसाक, गरगहना, थारु नाच पनि झल्काइने चौधरीले बताए । महोत्सव अघि ओमसतियामा रहेका विभिन्न संघसंस्था, आमा समूह, क्लबहरुले आफ्नो संस्कृति झल्कने गरी र्‍याली निकाल्ने बताइएको छ ।