विराटनगर : बिहीबारका लागि बोलाएको प्रदेश १ प्रदेशसभा बैठक सूचना प्रकाशित गरेर सारेको छ। बुधबार दिउँसो प्रदेशसभा सचिवालयले सूचना प्रकाशन गर्दै बैठकको मिति सारिएको जनाएको हो।
बिहीबार दिउँसो १ बजेका लागि बोलाइएको बैठक चैत २ गते दिउँसो १२:३० बजेका लागि सारिएको प्रदेशसभा सचिव गोपालप्रसाद पराजुलीले जानकारी दिए।
‘यस अघि बसेको बैठकमा प्रदेशसभा फागुन २० गते बिहीबारलाई डाकिएको थियो, विषेश कारणले बैठक सार्नुपर्ने भएकाले अबको बैठक चैत २ गते बोलाइएको हो’, सचिव पराजुलीले भने। उनले कारण भने खुलाएनन्।
प्रदेश १ का मुख्यमन्त्री शेरधन राईविरुद्ध नेकपाकै प्रचण्ड–नेपाल समुहका संसदले प्रदेशसभामा अविश्वासको प्रस्ताव दर्ता गरेको र यस अघिको बैठकमा सो प्रस्ताव प्रदेशसभामा टेवल भइसकेको छ। प्रस्ताव सदनमा प्रस्तुत गर्ने समयमा नेकपाको ओली समूह र प्रदेश सरकारले सो बैठक बहिस्कार गरेको थियो।
मुख्यमन्त्री शेरधन राईले पार्टीको विधान विपरित काम गर्ने १६ जना सांसदलाई तीन महिनाको लागि निलम्बन गरेका र ती सांसदको समेत उपस्थितिमा बैठक बसाएकाले बैठक बहिस्कार गरेको ओली समूहको दाबी छ।
नेपाल कम्यूनिष्ट पार्टी आधिकारिक रुपमा फुटिनसकेको समयमा नेकपा संसदीय दलको नेता मुख्यमन्त्री शेरधन राई नै रहने र उनले गरेका निर्णय नै प्रदेशसभामा नेकपाको तर्फबाट मान्य निर्णय हुने ओली समूहको भनाइ छ।
सोही विवादका कारण प्रदेशसभा बैठक पनि नियमित बस्न सकेको छैन। बसेको समयमा पनि सत्तापक्षबाटै कहिले विरोध त कहिले बैठक सार्न सभामुखलाई दबाव दिने गरेको प्रचण्ड–नेपाल समूहका सांसदको अरोप छ।
प्रतिक्रिया दिनुहोस !
