दाङ : दाङमा कोरोना संक्रमितको संख्या र यसबाट हुने मृत्युदर बढ्दै जान थालेपछि आजदेखि ९ दिनका लागि पहिलो चरणको लकडाउन गरिएको छ । जिल्ला कोरोना संकट व्यवस्थापन केन्द्रको गत मंगलबार बसेको बैठकले वैशाख १७ देखि २५ गतेसम्म जिल्लाभर लकडाउन गर्ने निर्णय गरेको हो । त्यसको पहिलो दिन बन्दाबन्दीको पूर्णत: प्रभाव देखिएको छ ।
बिहान ६ बजेदेखि २५ गते बेलुका ६ बजेसम्मका लागि पहिलो चरणमा लकडाउन भएको छ । त्यसपछि अवस्था हेरेर थप निर्णय लिइने छ । लकडाउन प्रभावकारी बनाउन सुरक्षा कडा पारिएको इलाका प्रहरी कार्यालय तुल्सीपुरका प्रमुख डिएसपी शिवबहादुर शिहले बताए ।
उनले सशस्त्रसहितको संयुक्त गस्ती गरिरहेको जानकारी दिए । उनकाअनुसार सडकमा बिरामीको चाप अत्यधिक छ । यस्तै अत्यावश्यक सवारी साधन बाहेक अन्य यातायात सञ्चालनमा रोक लगाईएको छ ।
तुल्सीपुर उद्योग बाणिज्य सघका अध्यक्ष रामप्रसाद चालिसेले विगतको भन्दा अहिले व्यवसायीहरु समेत सजक भएको बताए । उनले स्वतस्फूर्त रुपमा व्यवसाय बन्द गरेको बताए । चालिसेले बजारको कालोबजारी रोक्ने प्रयास समेत सघले गरेको बताए ।
दाङमा खाद्यान्नका पसल भने दैनिक बिहान ७ बजेदेखि ८ बजेसम्म खुल्नेछ । अति आवश्यक बाहेकका सवारी साधनहरूलाई मात्रै सञ्चालन अनुमति रहेको छ । अन्य सवारी साधन सडकमा चलेका छैनन् ।
प्रतिक्रिया दिनुहोस !
