कोरोना संक्रमितमाथि वीपी प्रतिष्ठानको लापरवाही: उपचार नपाएर घरमै मर्छन् बिरामी

धरान: सरकारले देशभरका अस्पतालहरुमा कोरोना संक्रमितहरुको उपचार प्रभावकारी बनाउन  निर्देशन दिएको भए पनि धरानस्थित वीपी कोइराला स्वास्थ्य विज्ञान प्रतिष्ठानले भने संक्रमितको उपचारमा चरम लापरवाही गर्ने गरेको आरोप पीडितहरुको छ ।

प्रतिष्ठानको व्यवस्थापन पक्षको कमजोरीका कारण कोभिड अस्पतालमा उपचारको लागि आउने सबै विरामीलाई भर्ना नगर्दा सयौँ विरामीहरु उपचार सेवाबाट बञ्चित भएका छन् । अस्पतालले भर्ना नलिएपछि धरानमा संक्रमितहरुको घरमै मृत्यु हुन थालेको छ ।

संघीय सरकारको आर्थिक सहयोगमा वर्ष दिनअघि प्रतिष्ठान हाताभित्र सय बेडको कोभिड अस्पताल सञ्चालनमा ल्याइएको थियो । सय बेडको कोभिड अस्पताल भने पनि प्रतिष्ठान व्यवस्थापन पक्षको लापरवाहीका कारण ५० भन्दा बढी विरामी भर्ना गरिएको छैन ।

कोरेनाको दोस्रो लहरमा सुनसरीमा एकसय २१ जना कोरोना संक्रमितको मृत्यु भएको छ । जसमध्ये धरान उपमहानगरपालिकाका चारजना संक्रमितको उपचार नपाएर घरमै मृत्यु भएको छ । वीपी प्रतिष्ठान धरानमा कोरोना संक्रमितको उपचारको दाहेरा नबढाएका कारण उपचार नपाएर चारजनाको होम आइसोलेशनमै रहेको अवस्थामा दुःखद निधन भएको धरानका मेयर तिलक राईले बताए ।

प्रतिष्ठानको कोभिड अस्पतालमा आईसीयू, एसडियू, र भेण्टिलेटर बेड समेत व्यवस्थापन नगर्दा विरामी भर्नामा गम्भीर समस्या भएको छ । प्रतिष्ठानमा दैनिक उपचारका लागिआउने कोरोना संक्रमित विरामीहरुलाई चिकित्सकहरुले बेड अभाव भएको भन्दै भर्ना गर्न अस्विकार गर्ने गरेका छन् ।

प्रतिष्ठानले संक्रमितहरुलाई उपचारका लागि भर्ना नलिँदा धरानका धेरै संक्रमितहरु बाध्य भएर घरमै बस्नु परेको मेयर राईले बताए । कोभिड उपचार प्रभावकारी बनाउन वीपी प्रतिष्ठानका उपकुलपति डा. ज्ञानेन्द्र गिरीलाई पटक–अनुरोध गर्दा समेत वास्ता नगरेको मेयर राईको आरोप छ ।

दोस्रो लहरको कोरोनाका कारण धरान उपमहानगरपालिकामा मात्र ३३ जना संक्रमितको मृत्यु भएको छ । कोभिड अस्पतालमा संक्रमितको उपचार चित्त बुझ्दो नभएको ससूरा गुमाएका धरान १५ का अईन्द्रविक्रम बेघाले बताए । 
अस्पतालमा खटिएका चिकित्सकहरुले संक्रमितको उपचार राम्रोसँग गर्ने भए पनि व्यवस्थापन पक्षले आवश्यक श्रोत साधन नदिएका कारण संक्रमितहरुको उपचार प्रभावकारी नभएको उनको गुनासो छ ।

प्रतिष्ठानको कोभिड अस्पतालमा १५ वटा भेण्टिलेटर भएको बताइए पनि हाल चारवटा मात्र सञ्चालनमा छन् । कोभिड अस्पतालमा रहेका आठ भेण्टिलेटर मध्य तीनवटा विग्रएको र एउटा डा. दिव्यराज मिश्रले पल्मुनोलोजी विभागमा जडान गरेको प्रतिष्ठानकै एक चिकित्सकले बताए ।

प्रतिष्ठानमा धरान, इटहरी, इनरुवाबाट दैनिक धेरै विरामी उपचारका लागि आउने गरेका छन् । यसका अतिरिक्त मोरङ, उदयपुर, धनकुटा, तेह्रथुम र झापाबाट समेत संक्रमित विरामी प्रतिष्ठान आउने गरेका छन् । प्रतिष्ठानको कोभिड अस्पतालका प्रमुख डा. ज्ञानेन्द्र मल्लले गत साल सय बेडको कोभिड अस्पताल सञ्चालनमा आए पनि यसपटक ७० जना सम्मको मात्र उपचार गरिँदै आएकाले सबै विरामीलाई भर्ना गर्न नसकिएको बताए । उनले कोभिड अस्पतालमा खटिएका सबै स्वास्थ्यकर्मीहरुले विरामीको राम्रोसँग उपचार गरिरहेको जानकारी दिएका छन् ।

धरानमा विजयपुर अस्पतालले पनि १५ बेडको छुट्टै कोभिड उपचार सेवा सुरु गरेको छ । तर, संक्रमित विरामीलाई चाहिने अक्सिजन प्रयाप्त रुपमा उपलब्ध नहुँदा विरामीको उपचारमा गम्भीर समस्या परेको अस्पताल निर्देशक प्रभाव खतिवडाले बताए ।

सुनसरीमा कोरोना संक्रमितको संख्या  ५ हजार ५ सय ५७ पुगेको प्रमुख जिल्ला अधिकारी उमेशकुमार ढकालले बताए । जसमध्ये २ हजार तीन सय ५८ जना निको भइसकेको जानकारी दिएका छन् । वीपी प्रतिष्ठानका सहायक प्रवक्ता चुडामणि पोखरेलले  सय बेडमा मिर्गौला, सर्जरी र बालबालिका विरामीहरुलाई समेत बेड छुट्याएर पूर्व तयारी गरिएकाले अन्य कोरोना संक्रमित विरामीहरुलाई भर्ना गर्न समस्या भएको बताए । उनले पल्मुनोलोजी विभागमा जडान गरेका भ्यानिटलेटर तत्काल कोभिड अस्पतालमा सारिने प्रतिबद्धता जनाएका छन् ।