दाङ: राष्टियसभा निर्वाचनमा एउटा अनौठो दृष्य देखियो । स्थानीय तहको उपाध्यक्षको एउटा मतमा मतपत्र गायव गरिएको छ भने त्यसका ठाउँमा कोरोना परीक्षण गरिएको रिपोर्ट खसालिएको छ ।
मतगणनामा बसेका दाङ कांग्रेसका सचिव शंकर डाँगीले मतपत्रको ठाउँमा पीसीआर रिपोर्ट पाइएको बताए । 'एक जना गाउँपालिका उपाध्यक्षले मतपत्र लगेर पीसीआर रिपोर्ट राखेर जानु भएछ,' उनले भने ।
अल्पमतमा देखिए मुख्यमन्त्री
राष्टियसभाको उपनिर्वाचनले लुम्बिनी प्रदेशमा मुख्यमन्त्रीको संसदको अवस्था पनि झल्किएको छ । संसदमा अल्पमतको सरकार बनाएकोमा विरोध गरिरहेका प्रतिपक्षहरुले निर्वाचनमा अल्पमतको सरकार रहेको पुष्टि गरिदिएका छन् ।
मुख्यमन्त्रीको पार्टीको उम्मेदवारले प्रदेशसभा सदस्यहरुबाट ४० मत मात्रै पाएका छन् भने विपक्षी गठबन्धनको उम्मेदवारले ४२ मत पाएका छन् । यसले मुख्यमन्त्रीको संसदमा अल्पमत प्रष्ट रुपमा देखाइदिएको छ, कांग्रेसका प्रदेश सांसद डिल्ली बहादुर चौधरील भने, 'यो निर्वाचन मात्रै नभएर मुख्यमन्त्रीका संसदीय हैसियत पनि देखाइदिएको छ ।'
प्रतिगमनलाई जवाफ
लुम्बिनी प्रदेशमा राष्ट्रियसभा उपनिर्वाचनबाट विजयी भएका नेपाली कांग्रेसका उम्मेदवार दृगनारायण पाण्डेले आफ्नो जितले प्रतिगमनलाई जवाफ दिएको बताएका छन् ।
निर्वाचनपछि प्रतिक्रिया दिँदै उनले यस्तो बताएका हुन् । उनले सदनमा अब संघीयता र गणतन्त्रका विषयलाई संस्थागत गर्न बुलंद रुपमा आवाज उठाउने बताए ।
संघीयता र गणतन्त्र ओझेलमा पार्ने काम भइरहेकोमा उनले असन्तुष्टि जनाए । साथै उनले प्रधानमन्त्री केपी शर्मा ओलीका कदमप्रति संकेत गर्दै आफ्नो जित प्रतिगमनलाई जवाफ भएको बताए । आफ्नो जितलाई उनले राष्ट्रिय एकताको रूपमा बुझ्न आग्रह गरेका छन् ।
प्रतिक्रिया दिनुहोस !
