जोमसोम: कोरोनाको तेश्रो भेरिएन्ट रोकथाम तथा नियन्त्रणका लागि सुरु भएको साताब्यापी 'नेपाल मास्क अभियान’ मा मुस्ताङका प्रमुख जिल्ला अधिकारी आफैँ स्थानीय स्तरमा खटिएका छन् ।
जिल्ला स्वास्थ्य कार्यालय, प्रहरी, प्रशासन र स्थानीय तहको संयुक्त सहभागिता संञ्चालित मास्क अभियानमा मुस्ताङका सिडिओ श्रीनाथ पौडेल स्थानीय स्तरमा खटिएको जिल्ला स्वास्थ्य कार्यालय मुस्ताङले जनाएको छ ।
'माहामारी नियन्त्रण तथा रोकथाममा मेरो प्रतिबद्धता, माक्स लगाउनु नै आजको आवश्यकता’ भन्ने नारासहित श्रावण २३ गतेदेखि सुरु भएको माक्स अभियानको चौथोदिन मंगलबार वारागुङ-३ छुसाङमा सिडिओ पौडेल आफैँ सरोकारवाला निकायसँग सहकार्य गर्दै नागरिकलाई मास्क लगाउन अनुरोध गरे ।
अभियान अन्तर्गत छुसाङका नागरिक तथा विभिन्नक्षेत्रमा काम गर्ने मजदुरलाई मास्क वितरण गरिएको हो ।अभियानको चरणमा जोमसोम कोरला सडकमै सिडिओ पौडेल, प्रहरी र स्वास्थ्य कार्यालयका कर्मचारीको टोलीले कोरोनाको तेश्रो लहर तथा यसबाट सुरक्षित रहन सकिने उपायका सम्वन्धमा नागरिकलाई सुसूचित गराएको छ ।
टोलीले कोरोनाको तेश्रो भेरिएन्टको जोखिम बढेकाले आवश्यक सावधानी अपनाउन समेत नागरिकलाई सुझाएको जिल्ला प्रहरी कार्यालय मुस्ताङका सूचना अधिकारी प्रहरी निरीक्षक प्रताप पौडेलले जानकारी दिए । उनका अनुसार टोलीले नागरिकलाई निशुल्क हातहातमा मास्क वितरण गरेको छ भने स्वास्थ्य कार्यालयले गाउँगाउँका नागरिकलाई एन्टिजेन परिक्षण गरेको छ । मुस्ताङ प्रहरीले जिल्लाका ३ हजार ५ सय नागरिकलाई निशुल्क माक्स वितरण गरेको जनाएको छ ।
यस्तै, स्वास्थ्य कार्यालयले मुस्ताङको वारागुङ मुक्तिक्षेत्र-३ छुसाङमा १ सय ४ जनाको एन्टिजेन परिक्षण गरेको हो । परिक्षण गराइएका मध्ये ९ जनाको रिपोर्ट भने पोजिटिभ आएको स्वास्थ्य कार्यालयले जनाएको छ । पोजिटिभ रिपोर्ट आएकामध्ये केहीले कोरोना बिरुद्धको खोप लगाइसकेका छन् भने केहीले खोप लगाउन नपाएको बताइएको छ ।
छुसाङमा भएको 'माक्स अभियानमा’ प्रहरी स्वास्थ्यकर्मी र वडा तहका प्रतिनिधिको टोलीले स्थानीय नागरिक, सडकमा गाडी चलाउने चालक-सहचालक , विभिन्न कन्ट्रक्सनका मजदुर लगायतलाई माक्स वितरण गरेको वडा सदस्य धर्क गुरुङले जानकारी दिए ।
मुस्ताङमा पनि कोरोनाको तेश्रो लहरको त्रास बढिरहेको बेला सरोकारवाला निकायको टोली गाउँघरमै उपस्थित भइ जनचेतना अभिवृद्धि तथा माक्स वितरण गरिनु स्वागयोग्य कदम भएको वडा सदस्य गुरुङले उल्लेख गरे । छुसाङमा भएको कार्यक्रममा स्थानीयबासी र विभिन्नक्षेत्रमा कार्यरत मजदुरको उल्लेख्य सहभागी रहेको थियो । मास्क अभियानमा नागरिकलाई 'म पनि मास्क लगाउछु,माक्स लगाउन अरुलाई पनि प्रेरित गर्छु’ भन्ने सन्देशसहित जनचेतना अभिबृद्धि गरिएको थियो ।
हिमाली जिल्ला मुस्ताङमा कोरोना संक्रमितको संख्या पुनःबृद्धि हुन थालेको स्वास्थ्य कार्यालय मुस्ताङको भनाइ छ। मुस्ताङमा कोरोना रोकथाम तथा नियन्त्रणका लागि विभिन्न चरणमा ९ हजार २ सय ७४ जना नागरिकले कोभिसिल , भेरोसिल र जोन्सन एण्ड जोन्सन खोप लगाइसकेका छन् । मुस्ताङका शतप्रतिशत नागरिकले कोरोना बिरुद्धको खोप लगाईसकेको अवस्था रहेपनि कोरोना जोखिम भने कायम रहेको छ । मुस्ताङमा हालसम्म ५ सय ३७ जना कोरोना संक्रमित मध्ये ४ सय ६५ जना निको भइसकेका छन् । संक्रमितमध्ये १५ जना कोरानाका कारण ज्यान गुमाईसकेका छन् । जिल्लामा अहिले ३१ जना सक्रिय कोरोना संक्रमति छन् ।
हिमाली जिल्ला मुस्ताङमा चाडपर्व नजिकिँदै गरेको र बजारिकरणका लागि स्याउ ढुवानी गर्ने समय समेत सुरु हुन थालेकाले कोरोना जोखिम बढ्न सक्ने अनुमान गरिएको छ ।जिल्ला प्रशासन कार्यालय मुस्ताङले गत बैशाख महिनादेखि चरणबद्ध रुपमा निषेधाज्ञा जारी गर्दै आईरहेको छ । कोरोनाका कारण प्रशासनले बैशाख ११ गतेदेखि मुक्तिनाथ मन्दिर बन्द गरेको थियो । मुक्तिनाथ बन्द भएसंगै यहाँको पर्यटन ब्यवसाय पूरै ठप्प छ ।
प्रतिक्रिया दिनुहोस !
