बिहीबारदेखि बेपत्ता युवकको शव कालिगण्डकी किनारमा भेटियो

जोमसोम: बिहीबार बिहानदेखि बेपत्ता एक युवाको शव मुस्ताङको थासाङ गापा-१ टुकुचेस्थित कालिगण्डकी नदी किनारमा भेटिएको छ ।

घरपझोङ गापा-२ मार्फास्थित एक डिस्टिलरी उद्योगमा काम गर्ने युवाको मृत शव कालिगण्डकी नदीमा शुक्रबार बिहान ११ बजे फेला परेको जिल्ला प्रहरी कार्यालय मुस्ताङले जनाएको छ ।

पूर्वी रुकुम पुथा उत्तरगंगा गाउँपालिका-९ घर भई हाल घरपझोङ-२ मार्फा बस्ने ३४ वर्षीय रोशन समालको शव कालिगण्डकी नदी किनारामा फेला परेको जिल्ला प्रहरी कार्यालय मुस्ताङका प्रहरी निरीक्षक आशिष अधिकारीले जानकारी दिए ।

युवा बेपत्ता भएको सूचना पाएपछि उनका दाई गौतम समालको रोहबरमा प्रहरी निरीक्षक अधिकारीसहितको प्रहरी टोलीले खोजी गरेको थियो । मार्फास्थित डिस्टिलरी उद्योगमा कार्यरत युवा सोही उद्योग भएको स्थानको केही नजिकैबाट कालिगण्डकी नदीमा हाम्फालेको हुनसक्ने प्रहरीको प्रहरीको प्रारम्भिक अनुसन्धानले जनाएको छ ।

प्रहरीले यसअघि खोजतलास गर्ने क्रममा युवाले प्रयोग गर्ने गरेको एक थान मोबाइल सेट र एकजोर चप्पल फेला पारेको थियो । मोबाइल र चप्पलको आधारमा खोजतलास गर्दै जाँदा थासाङ-१ टुकुचेस्थित कालिगण्डकी नदी बगरमा युवाको शव मृत अवस्थामा भेटिएको प्रहरीले जनाएको छ । युवाको शव अहिले प्रहरीले पोस्टमार्टमाका लागि जिल्ला अस्पताल जोमसोमको शव गृहमा लगेको छ । प्रहरीकमा अनुसार घटनाबारे आवश्यक अनुसन्धान भइरहेको छ ।