धरान: बीपी कोइराला स्वास्थ्य विज्ञान प्रतिष्ठान धरानका रजिष्ट्रार डा. मोहनचन्द्र रेग्मीले पदबाट राजीनामा दिएका छन् । रेग्मीले शुक्रबार प्रधानमनत्री शेरबहादुर देउवालाई रजिष्ट्रार पदबाट राजीनामा बुझाएको पत्र बुझाएका छन् ।
बीपी प्रतिष्ठानका ६ जना सिनेट सदस्यले वर्तमान चारैजना पदाधिकारीहरुलाई बर्खास्त गर्न बिहीबार प्रधानमन्त्री शेरबहादुर देउवालाई निवेदन दिएको भोलिपल्ट डा. रेग्मीले पदबाट राजीनामा दिएका हुन् ।
रेग्मीले सरकारले बीपी प्रतिष्ठानमा भएको छानविन प्रक्रियालाई सहयोग गर्न आफूले पदबाट राजीनामा दिएको राजीनामा पत्रमा उल्लेख गरेका छन् । स्वास्थ्य मन्त्रालयका सचिव डा. रोशन पोखरेलले रेग्मीले रजिष्ट्रार पदबाट राजीनामा दिएको पत्र प्रधानमन्त्रीलाई बुझाएको पुष्टि गरेका छन् । रेग्मीलाई तत्कालीन स्वास्थ्यमन्त्री भानुभक्त ढकालले बीपी प्रतिष्ठानको रजिष्ट्रारमा नियुक्त गरेका थिए ।
बीपी प्रतिष्ठानका उपकुलपति डा. ज्ञानेन्द्र गिरी, शिक्षाध्यक्ष डा. गुरु खनाल, रजिष्ट्रार डा. रेग्मी र निर्देशक डा. गौरीशंकर साहले प्रतिष्ठानमा करौडौं रुपैयाँ भ्रष्ट्राचार गरेको प्रतिष्ठान संचालन गर्न नसकेको भन्दै ७४ दिनदेखि प्रतिष्ठानका चिकित्सक र कर्मचारी आन्दोलनरत छन् ।
प्रतिष्ठान सुद्धिकरणको माग राखेर चिकित्सक र कर्मचारीहरुले आन्दोलन सुरु गरेपछि प्रतिष्ठानमा भएको आर्थिक अनियमिताका विषयमा छानविन गर्न प्रधानमन्त्री देउवाले प्रधानमन्त्री कार्यालयका सचिव डा. बैकुण्ठ अर्यालको संयोजकत्वमा ८ सदस्य समिति गठन गरेका थिए । उक्त समितिले प्रतिष्ठानका चारैजना पदाधिकारीहरु आर्थिक अनियमिताका घटनामा मुछिएको र सही ढंगले प्रतिष्ठान संचालन गर्न नसकेको भन्दै कारवाही गर्न सिफारिस गरेको थियो ।
प्रतिक्रिया दिनुहोस !
