काठमाडौँः नेकपा एमालेले भारतीय सीमा सुरक्षा बलका सुरक्षाकर्मीले तुइन चुँडाएर जयसिंह धामी महाकाली नदीमा वेपत्ता भएको घटनाको सम्बन्धको सत्यतथ्य सार्वजनिक गर्न माग गरेको छ ।
गत २०७८ साउन १५ गते महाकाली नदी पार गर्ने क्रममा भारतीय सीमा सुरक्षा बलका सुरक्षाकर्मीले तुइन चुँडाएर धामी महाकाली नदीमा वेपत्ता भएका थिए । (एमाले)ले यस घटनाका सम्बन्धमा अविलम्ब सत्यतथ्य सार्वजनिक गर्न, दोषीलाई कारवाही र पीडित परिवारलाई न्याय दिलाउन माग गरेको छ ।
प्रवक्ता प्रदीपकुमार ज्ञवालीले विज्ञप्ति जारी गर्दै छानविन गर्न गठित समितिको म्याद पटक–पटक थपेर निकै ढिलो गरी प्रतिवेदन बुझाइए पनि प्रतिवेदन अस्पष्ट रहेको जनाएको छ ।
एमालेले यस घटनालाई सरकारले थामथुम गर्ने प्रयास गर्नखोजेको आरोप लगाएको छ । 'आफ्ना नागरिक वेपत्ता पारिएको यति संवेदनशील घटनाका सम्बन्धमा भारतीय पक्षसँग जानकारी लिने, सोधपुछ गर्ने र आपत्ति जनाउने सामान्य औपचारिकता र कुटनीतिक पहल गर्न नसक्ने सरकारले नेपाली जनताको ध्यान यस घटनाबाट अन्यत्रै मोड्न खोजेको आशङ्का पैदा भएको छ,' विज्ञप्तिमा भनिएको छ । नागरिकको जीवनसँग जोडिएको यस्तो गम्भीर विषयमा सरकारले प्रदर्शन गरेको संवेदनहीनता र लाचारीप्रति खेद व्यक्त प्रकट गरेको छ ।
प्रतिक्रिया दिनुहोस !
