मनाङको तापक्रम माइनस २ डिग्री : जनजीवन कष्टकर, किसान भने खुसी (फोटोसहित)

बेँसीशहर : मंगलबारदेखि परेको हिमपातका कारण हिमाली जिल्ला मनाङको तापक्रम माइनसमा झरेको छ । मनाङका प्रमुख जिल्ला अधिकारी रविन्द्रप्रसाद आचार्यका अनुसार तापक्रम माइनस २ डिग्रीसम्म पुगेकाले जनजीवन कष्टकर बनेको छ ।

‘चिसो अत्याधिक बढेको छ । कोहिपनि घरबाहिर निस्कन सकेका छैनन्’, प्रजिअ आचार्यले भने, ‘मगंलबार र बुधबार गरेर सदरमुकाममा २ फुट र माथिल्लो मनाङ क्षेत्रमा ३ फुट भन्दा बढि हिउँ जमेको छ ।’ बाक्लो हिमपातका कारण सडक अवरुद्ध बनेको छ । सवारी साधन चल्न सकेका छैनन् । 

धारापानीबाट माथि सबै ठाउँमा हिउँ परेको छ । हिमपातले अत्याधिक चिसो बढेकाले नागरिकलाई सुरक्षित रहन प्रहरी प्रशासनले अनुरोध गरेको छ । ‘चिसोबाट बच्न सर्वसाधरणलाई घर बाहिर ननिस्कन र न्यानो भएर बस्न सूचना गरेका छौं’ प्रजिअ आचार्यले भने, ‘राति चामेको तापक्रम माइनस ७ डिग्री सेल्सियस थियो । अहिले माइनस २ डिग्री सेल्सियस छ ।’ चिसोका कारण सरकारी कार्यालयमा सेवाग्राही आएका छैनन् । मानिस एक घरबाट अर्को घर जान सकेका छैनन् ।

धारापानी भन्दा मुनि ताल क्षेत्रमा पानी परेकाले बाढीपहिरोको जोखिम हुन सक्ने भन्दै जोखिममा रहेका बस्तीका नागरिकलाई सुरक्षित रुपमा बस्न प्रशासनले सूचना जारी गरेको छ ।

मनाङका प्रहरी नायब उपरीक्षक सुवास खड्काका अनुसार हिउँ जमेको बाटो खुलाउन नसकिएको बताए । हिमपात भइरहँदा बाटो खुलाउन समस्या हुने र खुलाए पनि पुनः हिमपातले हिउँ जम्ने उनले बताए । हिउँ स-साना खोलानाला, झरना र मस्र्याङ्दीको छेउछाउमा पनि जमेको छ । नागरिकलाई सुरक्षित भएर बस्न प्रहरीले अनुरोध गरेको छ ।

हिमपातका कारण मनाङीहरू घरभित्रै बसेका छन् । हिमपातले जनजीवन कष्टकर बनाएपनि किसानहरु भने खुसी भएका छन् । गौरीशंकर आधारभूत विद्यालयका प्रधानाध्यापक कमल गुरुङले हिमपातले आलु, फापर, गहुँ, जौ र उवालगायतका बालीलाई राम्रो गर्ने हुँदा किसानहरु खुसी भएको बताए । 

मनाङसँगै बुधबार लमजुङका उच्च पहाडी क्षेत्रमा पनि हिमपात भएको छ भने तल्लो क्षेत्रमा झरी परेको छ ।