दैलेखमा भारी हिमपात : जनजीवन प्रभावित, यातायात अवरुद्ध
माघ २१, २०७८ शुक्रबार १३:०:०
दैलेख : बिहीबार बिहानैदेखि वर्षासँगै भारी हिमपात भएको छ । यसअघि महाबु, तिनचुले हिमाललगायत दैलेखको उच्च भू-भागमा मात्रै हिमपात भएको थियो । बिहीबार रातीदेखि भने गुराँस गाउँपालिकाको गुराँसे क्षेत्र, रानीमत्ता, महाबु गाउँपालिकाको महाबुलगायत जिल्लाका ११ वटै स्थानीय तहको उच्च भू-भागहरुमा भारी हिमपात भएको हो। 
नौमूले गाउँपालिकाको तोली, बालुवाटार, सल्लेरी, चौराठा, भगवतीमाई गाउँपालिकाको रुम, जगनाथ, कट्टी, मेहेल्तोली, मन्घर, वडाभैरब, डुङ्गेश्वर गाउँपालिकाको लाँकुरी, अवलपराजुलको माथिल्लो भूभाग, गुराँस गाउँपालिकाको गुराँसे, लाँलीकाडा, पिलाडी, घोडाबासलगायतका क्षेत्रमा भारी हिमपात भएको छ । 
यस्तै, महाबु गाउँपालिकाको काशिकाँध, गैडाबाज, रानीवन, भैरबी गाउँपालिकाको कुसापानी, चामुण्डाविन्द्रासैनी नगरपालिकाको काफलमेला, चापागाउँ, ठाटीकाँध गाउँपालिकाको विशाला, हिमपाईला, बिजारे, तोलीजैसी, आठबीस नगरपालिकाको सिंहासैन, पिपलकोट र तिलेपाटा र दुल्लु नगरपालिकाको मालिकाक्षेत्रमा हिमपात भएको छ।
नारायण नगरपालिकास्थित दैलेख जिल्ला सदरमुकामसहित भवानी तथा आसपासका क्षेत्रमा हिमपात भएको छ । जिल्ला सदरमुकाममा भने झण्डै १२ वर्षपछि सामान्य हिमपात भएको छ । यसअघि दैलेख जिल्ला सदरमुकाममा २०६६ सालमा भारी हिमपात भएको थियो ।
गुराँसे क्षेत्रमा भारी हिमपात हुँदा यातायात सेवा अवरुद्ध भएको छ । दैलेख देखि गुराँसेहुँदै सुर्खेतसम्मको यायातात सेवा अबरुद्ध भएको जिल्ला प्रहरी कार्यालय दैलेखका डीएसपी भुवनेश्वर प्रसाद साहले बताए । हिउँ परेसँगै जिल्लाभर अत्याधिक चिसो बढेको छ ।
रातिदेखि नै हिमपात सुरु भएपछि जनजीवन कस्टकर बनेको छ । हिमपातले एक्कासी बढेको चिसोले विशेषगरी वृद्धवृद्धा, बालबालिका तथा गरिखाने वर्ग बढी प्रभावित भएका छन् । दैलेखसहित कर्णालीका कालिकोट, जुम्ला, हुम्ला, मुगु, डोल्पा लगाएतका जिल्लामा समेत भारी हिमपात भएको छ । 
प्रतिक्रिया दिनुहोस !
