तेह्रथुम : तेह्रथुमको म्याङलुङ बजारमा मंगलबार बिहान आगलागी हुँदा एक घर जलेर नष्ट भएको छ । शिवकुमार पाङगेन्हाङ लिम्बुको घरमा बिहान करिब ५:२० तिर अचानक लागेको आगोले घर पूर्ण रुपमा जलेर नष्ट भएको जिल्ला प्रहरी कार्यलय तेह्रथुमले जनाएको छ ।
आगोले घरमा डेरा बस्ने म्याङलुङ नगरपालिका–१ का अर्जुन अधिकारीको भाडाकुँडा, लत्ताकपडा, अन्नपात, गरगहना लगायत सम्पूर्ण सामग्री जलेर नष्ट भएको छ । आगो नियन्त्रणको क्रममा १ घरमा समेत क्षती भएको छ । आगलागीले मानविय क्षति भने नभएको जिल्ला प्रहरी कार्यलय तेह्रथुमका प्रहरी निरीक्षक कोमल ठाकुरले जानकारी दिए।
आगो स्थानीयबासी, नेपाली सेना र प्रहरीको सक्रियतामा करिब दुईघण्टा पछि मात्र नियन्त्रणमा लिएका थिए । आगो निभाउनका लागी म्याङलुङ नगरपालिकाको दमकल समेत ढिला आएको र दमकल आएपनि दक्ष जनशक्ती अभावका कारण घर जोगाउन नसकिएको स्थानीयबासी सुमन बस्नेतले दुखेसो पोखे ।
घरमा श्राद्ध रहेको र सेलरोटी पकाउने क्रममा ग्याँस लिख भई आगलागी सुरु भएको स्थानीयबासीले बताएका छन् । क्षतिको विवरण संकलनकार्य जारी रहेकाले के कति क्षति भयो भन्ने एकिन भई नसकेको प्रमुख जिल्ला अधिकारीअनोज कुमार घिमिरेले बताए ।
सदरमुकाम म्याङलुङ बजार पटक पटक आगलागीको चपेटामा पर्दै आएको छ । यस अघि २०५९ सालमा ८५ घर र २०७० सालमा ८ घर आगलागीको कारण जलेर नष्ट हुदा सयौ परिवार विस्तापित भएका थिए ।
प्रतिक्रिया दिनुहोस !
