ढल्केवर(धनुषा) : धनुषामा लागुऔषध गाँजासहित एकजनालाई प्रहरीले पक्राउ गरेको छ। पक्राउ पर्नेमा धनुषाको सबैला नगरपालिका–१३ किरतपुर बस्ने ३२ वर्षीय सन्तोषकुमार यादव रहेको प्रहरीले जनाएको छ।
इलाका प्रहरी कार्यालय यदुकुहाबाट गस्तीमा खटेको प्रहरी टोलीले शहिदनगर नगरपालिका–३ स्थित यदुकूहा–जनकपुर पक्की सडक खण्डबाट यादवलाई ९ किलो ७०० ग्राम लागूऔषध गाजासहित पक्राउ गरेको हो।
मोटरसाइकलमा बोरा राखेर सवार यादवमाथि शंका लागेर चेकजाँच गर्दा मोटरसाइकलको पछाडिपट्टि रबरले बाँधेर राखेको बोराभित्र लुकाई–छिपाई गरी राखिएको अवस्थामा ९ किलो ७०० ग्राम लागुऔषध गाँजा फेला परेको प्रहरीले जनाएको छ। उनको साथबाट ३२ हजार नगद, १ थान रेडमी कम्पनीको मोबाइल र प्रदेश नं २–०२–००४ प ११४७ नम्वरको मोटरसाइकल समेत बरमाद भएको धनुषाका प्रहरी प्रवक्ता एवं डिएसपी जितेन्द्र बस्नेतले जानकारी दिए।
लागुऔषध गाँजासहित पक्राउ परेका यादवलाई लागुऔषध मुद्दामा धनुषा जिल्ला अदालतबाट ७ दिनको म्याद थप लिइ अनसन्धान भइरहेको डिएसपी बस्नेतले बताए।
प्रतिक्रिया दिनुहोस !
