मुस्ताङमा स्थानीय तह निर्वाचनका लागि ५ दलले गरे दल दर्ता

जोमसोम : आसन्न स्थानीय तह निर्वाचनका लागि मुस्ताङमा ५ दल दर्ता भएका छन् । जिल्ला निर्वाचन कार्यालय मुस्ताङका अनुसार राष्ट्रिय मान्यता प्राप्त ६ ठूला दलबाहेक जिल्लामा जम्मा ५ वटा दलले मात्र निर्वाचन चिन्ह लिन कार्यालयमा दल दर्ता गराएका हुन् । जिल्ला निर्वाचन कार्यालय मुस्ताङले राष्ट्रिय मान्यता प्राप्त ६ दलसहित ७९ वटा दलले निर्वाचन आयोगमा दल दर्ता गरेकोमा मुस्ताङमा ५ वटा दलले मात्र दल दर्ता गरेको जनाएको छ ।

निर्वाचन आयोगले स्थानीय तह निर्वाचनका लागि यही चैत्र २ गतेदेखि चैत्र ६ गते सम्म दल दर्ता गर्ने समय अवधि तोकेमा मुस्ताङमा राष्ट्रिय प्रजातन्त्र पार्टी,राष्ट्रिय प्रजातन्त्र पार्टी नेपाल,समाजिक एकता पार्टी,नेपाल कम्युनिस्ट पार्टी समाजवादी र नेपाली कांग्रेस विपीले निर्वाचन चिन्ह लिन दल दर्ता विवरण पेश गराएको जिल्ला निर्वाचन कार्यालय मुस्ताङका प्रमुख मदन अर्यालले जानकारी दिए ।

कार्यालय प्रमुख अर्यालका अनुसार राष्ट्रिय मान्यता प्राप्त दल नेपाली कांग्रेस,नेकपा (एमाले),नेकपा (माओवादी केन्द्र ),नेकपा ( एकीकृत समाजवादी ), जनता समाजवादी पार्टी (जसपा ) र  लोकतान्त्रिक समाजवादी पार्टी ( लोसपा) ले निर्वाचन चिन्ह लिन जिल्ला निर्वाचन कार्यालयमा विवरण बुझाउनु नपर्ने भएपनि जनता समाजवादी पार्टी (जसपा ) र लोकतान्त्रिक समाजवादी पार्टी( लोसपा)को मुस्ताङ सहभागी छैन ।

मुस्ताङमा मुख्य राष्ट्रिय मान्यता प्राप्त दल नेपाली कांग्रेस र नेकपा एमालेबीच मुख्य प्रतिस्पर्धा हुने जनाइएको छ । मुस्ताङमा नयाँ दल दर्ताको विवरण आयोगमा पठाइ सकिएको कार्यालय प्रमुख अर्यालले जानकारी दिए । आगामी बैशाख ३० गते हुने स्थानीय तह निर्वाचनका लागि मुस्ताङका ५ स्थानीय तहमा ३८ मतदान केन्द्र तोकिएको छ ।

निर्वाचन सुरक्षाका लागि २ सय ३२ जना म्यादी प्रहरी परिचालन हुने जनाईएको छ । मुस्ताङका ५ स्थानीय तहमा कुल १० हजार ४ सय १४ मतदाता छन् ।