लोमान्थाङमा एमालेले अध्यक्ष/उपाध्यक्षसहित वडाध्यक्ष उम्मेदवारको चयन गर्यो
वैशाख ७, २०७९ बुधबार १४:२२:०
जोमसोम : आसन्न स्थानीय तह निर्वाचनका लागि नेकपा एमालेले मुस्ताङको लोमान्थाङ गाउँपालिकामा अध्यक्ष/उपाध्यक्षसहित ५ वटै वडामा आफ्ना उम्मेदवारको टुंगो लगाएको छ। एमाले पालिका तथा वडास्तरीय कमिटीले सर्वसम्वत उम्मेदवार चयन गरेको जनाइएको छ ।
एमाले लोमान्थाङ पालिका कमिटी अध्यक्ष निमा ढिन्डुक गुरुङको अध्यक्षता तथा एमाले गण्डकी प्रदेश कमिटी सदस्य ईन्द्रधारा बिष्टको विशेष उपस्थितिमा एमालेले लोमान्थाङ गाउँपालिकाका लागि उम्मेदवार छनौट गरेको हो । नेकपा एमालेले लोमान्थाङ गाउँपालिकाका लागि अध्यक्षमा लोमान्थाङ—३ ठिङ्गरका टसी नर्बु गुरुङ र उपाध्यक्षमा लोमान्थाङ—५ की छिमी बिष्ट गुरुङलाई उम्मेदवार बनाउन निर्णय गरेको गण्डकी प्रदेश कमिटी सदस्य ईन्द्रधारा बिष्टले जानकारी दिए ।
उनका अनुसार एमालेले लोमान्थाङ—१ मा हिमा ढिन्डु गुरुङ,लोमान्थाङ—२ मा कर्मा नाम्ग्याल गुरुङ,लोमान्थाङ—३ मा आङजेन गुरुङ,लोमान्थाङ—४ मा गोम्वो गुरुङलाई वडाध्यक्षको उम्मेदवारको रुपमा उभ्याएको हो । लोमान्थाङका ५ वटै वडाहरुको वडासदस्यको उम्मेदवार तय गर्ने विषयमा छलफल भइरहेको गण्डकी प्रदेश कमिटी सदस्य बिष्टले बताए ।
यसअघि एमाले लोघेकर दामोदरकुण्ड गाउँपालिकाको अध्यक्षमा लोप्साङ छोम्फेल बिष्टलाई उम्मेदवार बनाउने निर्णय गरेको थियो । यता नेपाली कांग्रेसले लोमान्थाङ गाउँपालिकामा लोमान्थाङ—१ छोसेरका टसी गुरुङलाई उम्मेदवार बनाउने निर्णय गरेको थियो ।
एमालेले घरपझोङ—३ को वडाध्यक्षमा फडिन्द्र थकालीलाई उम्मेदवार बनाउने भएको छ । आसन्न स्थानीय तह निर्वाचनका लागि उम्मेदवारी दर्ता गर्ने दिन नजिकिएसँगै मुस्ताङमा नेपाली कांग्रेस ,नेकपा एमालेलगायतका दलहरु तीब्ररुपमा उम्मेदवार छान्न छुटेका छन् ।
पार्टी स्रोतका अनुसार मुस्ताङका ५ वटै स्थानीय तहमा उम्मेदवार दिने व्यक्तिको नामावली शुक्रबारसम्म सार्वजनिक गर्ने बताएका छन् । नेपाली कांग्रेसबाट लोमान्थाङमा अध्यक्ष पदमा उम्मेदवारी दिन छोसेर निवासी टसी गुरुङ स्वास्थ्यकर्मी हुन् ।
उनले निर्वाचनमा उम्मेदवार बन्ने भएपछि स्वास्थ्यक्षेत्रबाट राजीनामा गरेका छन् ।एमालेबाट लोमान्थाङमा अध्यक्षका उम्मेदवार टसी नर्बु गुरुङ पनि स्वास्थ्यकर्मी हुन् । उनी उपल्लो मुस्ताङको जिग्मे फाउन्डेसनमा कार्यरत थिए ।उपाध्यक्ष छिमी बिष्ट गुरुङ स्थानीय समाजसेवी हुन् । उनी लोमान्थाङ आमा समूहको अध्यक्ष र सचिव पदमा कार्यसम्पादन गरेकी थिइन् । उनी स्थानीय तह निर्वाचन २०७४ पछि माओवादी केन्द्र छोडेर एमालेमा प्रवेश गरेकी थिइन् ।
यस्तै, एमालेबाट अध्यक्ष पदमा उम्मेदवारी दिने लोप्साङ छोम्फेल बिष्ट पालिका अध्यक्ष हुन् ।उनी जिग्मे फाउन्डेसनको कोषाध्यक्ष एवं उपल्लो मुस्ताङको विकासमा उनको योगदान महत्वपूर्ण छ । यस्तै लोघेकर —१ मा पूनः टै ढिन्डुक ठकुरीलाई वडाध्यक्ष उम्मेदवार एमालेले बनाउने भएको छ ।उनी २०७४ को स्थानीय तह निर्वाचनका वडाध्यक्षमा जीत हाँसिल गरेका थिए ।
प्रतिक्रिया दिनुहोस !
