एमालेको किल्ला भत्काउँदै मुस्ताङको घरपझोङमा कांग्रेसको इन्ट्री
वैशाख ३१, २०७९ शनिबार ११:५९:०
जोमसोम : मुस्ताङ सदरमुकाम घरपझोङ गाउँपालिकामा नेपाली कांग्रेसले बाजी मारेको छ । स्थानीय तह निर्वाचन २०७४ मा नेकपा एमालले अध्यक्ष र उपाध्यक्ष पद जितेकोमा त्यो रेकर्ड कांग्रेसले ५ वर्षपछि उल्टाएको छ । घरपझोङ गाउँपालिकाको अध्यक्ष पदमा नेपाली कांग्रेसका उम्मेदवार मोहनसिंह लालचन ७६० मतले विजय भएका छन् ।
उनका निकटम् प्रतिद्वन्दी नेकपा एमालेका उम्मेदवार सञ्जयकुमार थकालीले ७५८ मत प्राप्त गरे । घरपझोङको अध्यक्ष पदमा कांग्रेसका उम्मेदवार लालचन २ मतको अन्तरले विजय भएका हुन् । यस्तै, घरपझोङको उपाध्यक्ष पदमा नेपाली कांग्रेसकी उम्मेदवार जमुना थकालीले ६९३ मत प्राप्त गरी विजयी भइन् । उनका निकतम् प्रतिद्वन्दी नेकपा एमालेका उम्मेदवार मिमकुमारी शेरचनले ६१८ मत प्राप्त गरिन् ।उपाध्यक्ष पदमा ७५ मत अन्तरले कांग्रेस उम्मेदवार थकाली विजय भएकी हुन् ।
घरपझोङ गाउँपालिका वडा–३ को वडाध्यक्ष पदमा नेकपा एमालेका उम्मेदवार फडिन्द्र थकालीसहित एमालेको प्यानल विजयी भएको छ । यस्तै, घरपझोङ –४ को वडाध्यक्ष पदमा कांग्रेसका यमप्रसाद थकालीसहितको प्यानल विजय भएको हो । यसअघि स्थानीय तह निर्वाचनअन्तर्गत घरपझोङ १,२ र ५ वडामा कांग्रेस,एमाले,माओवादी केन्द्र र समाजवादीका उम्मेदवार निर्विरोध भएका थिए ।
केन्द्र तहको सत्ता गठबन्धनले जिल्लामा मिलेर निर्वाचनमा सहकार्य गर्ने निर्णय गरेको थियो । गठबन्धनकै कारण घरपझोङमा नेपाली कांग्रेसले अध्यक्ष पद जित्न सफल भएको हो ।
प्रतिक्रिया दिनुहोस !
