महेन्द्रनगर : कञ्चनपुरको भीमदत्त नगरपालिका र कृष्णपुर नगरपालिकामा मतगणना स्थगित भएको छ ।
आइतबार भीमदत्त नगरपालिका–२ को मतगणना गर्दा एक सय मतपत्र भनि खोलिएको पोकामा एक सय २३ मतपत्र भेटिएपछि विवाद हुँदा गणना रोकिएको थियो ।
मतगणना सुचारुका लागि पटकपटक सर्वदलीय बैठक बसेर छलफल भएपनि सहमति जुट्न नसक्दा गणना हुन सकेको छैन ।
मतगणनाका क्रममा मतपेटिकामै अधिक मत पाइएपछि नेकपा एमालेसहित अन्य दलहरुले विरोध जनाउँदै पुनः निर्वाचनको माग गर्दै आएका छन् । वडा नम्बर २ स्थित सरस्वति माध्यामिक विद्यालयमा भएको मतदानमा गणना गर्दा अधिक मत पाइएको थियो ।
निर्वाचन कार्यालयले एक सय मतपत्र भनि खोलिएको पोकामा एक सय २३ मतपत्र भेटिएपछि विवाद भएको बताए । मुख्य निर्वाचन अधिकृत मदन धामीले निर्वाचन आचारसंहिता अनुसार पुनः मतदान गर्न नमिल्ने बताए ।
तर, मत काउन्ट गर्नेबेला गणक परिर्वतन गरिँदा केही यताउता परेको उनले बताए । भीमदत्त नगरपालिकामा मेयर र उपमेयरमा नेपाली कांग्रेसका उम्मेदवारले अग्रता लिएका छन् ।
नेपाली कांग्रेसका मेयरका उम्मेदवारले १२३३,उपमेयरका उम्मेदवारले ९३९ मत ल्याएका छन भने एमालेका मेयरका उम्मेदवारले ३४३ र नेकपा एस र माओवादीका गठबन्धनका उम्मेदवारले २२१ मत प्राप्त गरेका छन् ।
त्यसैगरी, कृष्णपुर नगरपालिकामा पनि मतगणना स्थगित भएको छ । कृष्णपुर नगरपालिका ९ को पञ्चाधिन माध्यामिक विद्यालयको बुथ केन्द्रको मतगणना हुँदा खसेको मतभन्दा बढी मत गणना गर्दै नतिजा सार्वजनिक भएपछि नेकपा एमाले र माओवादी केन्द्रले विरोध गरेका छन् ।
पञ्चाधिन बुथ केन्द्रमा १ हजार ९ सय १४ मत खसेकोमा २ हजार ६४ मत गणना भएको भन्दै नतिजा प्रकाशित गरिएको थियो । कृष्णपुर नगरपालिकाका प्रमुख निर्वाचन अधिकृत नरेन्द्रबहादुर बुढाले कम्पुटरमा डाटा इन्ट्री गर्दा गल्ती भएको बताए । कृष्णपुरमा नेपाली कांग्रेसले अग्रता लिएको छ । नेपाली कांग्रेसका मेयर उम्मेदवारले ८ सय ९८, एमालेका मेयर उम्मेदवारले ५ सय २९ र माओवादी केन्द्रका उम्मेदवारले ४ सय ७९ मत पाएका छन ।
एक पालिकामा कांग्रेस र एकमा एमाले विजयी
नौ वटा स्थानीय तह रहेको कञ्चनपुरमा दुई पालिकामा मतगणना सम्पन्न भएको छ । बेलडाँडी गाउँपालिकामा नेपाली कांग्रेसका अध्यक्ष पदका उम्मेदवार हरिशचन्द्र राना ४१०३ मत ल्याएर विजयी भएका छन् । उनका निकटतम प्रतिस्पर्धी नेकपा एमालेका अकलबहादुर विष्टले २३०१ मत ल्याएका छन् ।
यस्तै, गाउँपालिका उपाध्यक्षमा पनि नेपाली कांग्रेसकी शान्ति नाथले ३६७३ मत ल्याइ विजयी भएकी छिन् ।
त्यसैगरी, लालझाडी गाउँपालिकामा नेकपा एमाले विजयी भएको छ । गाउँपालिकाको अध्यक्षमा निर्मल राना ४५१६ मत ल्याई विजयी भएका छन् ।
उनका निकटतम प्रतिद्वन्द्वी माओवादी केन्द्रका मदनसेन वडायकले २८५८ मत ल्याए । उपाध्यक्षमा पनि एमालेकै सपना चौधरी राना विजयी भएकी छिन । उनले ३५६१ मत ल्याउदा उनकी निकटतम प्रतिद्वन्द्वी नेपाली कांग्रेसकी राधा रानाले ३४९३ मत ल्याइन ।
प्रतिक्रिया दिनुहोस !
