खाँडादेवी गाउँपालिका -६ को वडा अध्यक्षमा कांग्रेसका कार्की निर्वाचित
रामेछाप : खाँडादेवी गाउँपालिका- ६ को वडा अध्यक्षमा नेपाली कांग्रेसका उमेदवार नारायण कार्की निर्वाचित भएका छन् । नेकपा एमालेका गोपाल कार्कीलाई १ सय २७ मतान्तरले पराजित गर्दै उनी निर्वाचित भएका छन्। नारायणले ७०४ मत ल्याउँदा उनले निकटतम प्रतिद्वन्दी गोपालले ५७७ मत प्राप्त गरेका छन् ।
खाँडादेवी गाउँपालिका नेपाली कांग्रेस रामेछापका नेता उत्पादन गर्ने स्थलको रुपमा चिनिन्छ । तर त्यो पालिकामा २०७४ सालको स्थानीय निर्वाचनमा पनि कांग्रेसले एउटामात्र वडा जितेको थियो भने अहिलेको स्थानीय निर्वाचनमा पनि एउटा वडा जितेर आफ्नो शाख बजाउन सफल भएको छ । २०७४ सालमा वडा नं. २ जितेको कांग्रेसले अहिले वडा नं. ६ मा विजयी भएको हो।
खाँडाडेवी गाउँपालिकामा नेपाली काँग्रेसका केन्द्रिय महाधिवेशन प्रतिनिधि र जिल्ला स्तरका गरि एक दर्जन भन्दा बढी नेता रहेका छन् तर स्थानीय निर्वाचन भने आज सम्म जित्न सकेका छैनन् । नेतृत्वमा देखिएको चरम गुठगत स्वार्थ र एक अर्काको अस्तित्व स्वीकार गर्न नसक्दा नेपाली काँग्रेसले खाँडादेवी गाउँपालिकामा आफ्नो नेतृत्व उपस्थित गराउन सकेको छैन ।
पालिकामा कांग्रेसको बिरासत जोगाउने एक व्यक्ति नारायण कार्की होटल मजदुर, सवारी चालक देखि वैदेशिक रोजगारमा समेत गएर आएका व्यक्ति हुन् । संकटमा सहयोग बोकेर गाउँ–गाउँमा पुग्ने कार्की सामाजिक रुपमा सधैं अग्रसर हुने व्यक्ति हुन् । संघर्षले जन्माएको समाजसेवी हुन कार्की । आफ्नो कमाइको नाफा सधैं समाजसेवामा खर्च गर्ने कार्कीको वडाबासीमा राम्रै प्रभाव रहेको देखिन्छ । निर्वाचित कार्की भन्छन् 'वडाबासीको सेवामा सदा सर्वदा उपस्थित हुने छु ।' भ्रष्टाचार गर्दिन, भ्रष्टाचार हुन दिन्न र शिक्षा प्रणाली सुधार गरेर आधुनिक शिक्षाको विकास वडामा थालनी गर्ने कार्की बताउँछन् । आफ्नो घोषणा पत्र अनुसार काम गरेर ५ वर्षमा नमूना वडा बनाउनेमा कार्की प्रतिबद्ध गरेका छन् ।
खाडाँदेवी गाउँपालिकामा अध्यक्ष, उपाध्यक्षसहित ७ वडाध्यक्षमा एमाले र नेपाली कांग्रेस/माओवादी केन्द्रले १/१ वडा जितेका हुन्।