भरतपुर : चितवनका जेष्ठ पत्रकारले मासिक भत्ता पाएका छन् ।
नेपाल पत्रकार महासंघ चितवन शाखाका सदस्य रहेका चारजनाले भत्ता पाएका हुन् ।
भरतपुर महानगरपालिकाभित्र बसोवास गर्ने जेष्ठ पत्रकारले मासिक चार हजारका दरले भत्ताको व्यवस्था गरेको हो।
नेपाल पत्रकार महासंघ चितवन शाखा र भरतपुर महानगरपालिकाले ‘जेष्ठ पत्रकार निवृत्तीभरण कोष ’स्थापना गरेको हो ।
भरतपुर महानगरभित्र बसोबास गर्ने पत्रकारको मासिक भत्ताको लागि भरतपुर महानगरपालिकाले कोषमा २० लाख रुपैयाँ जम्मा गरेको छ।
पत्रकार महासंघले एक लाख रुपैयाँ राखेको छ । कोषबाट भरतपुर महानगर भित्रका महिला , दलित , अल्पसंख्यक र अपांगको हकमा ५५ वर्ष र ६० वर्ष कटेका अन्य पत्रकारले भत्ता पाउने नेपाल पत्रकार महासंघ चितवनका अध्यक्ष नारायण अधिकारीले बताए ।
‘महासंघले जेष्ठ अवस्थामा पनि सम्झियो भन्ने हो,'उनले भने , 'यो भत्ताले जेष्ठ पत्रकारको दैनिकीमा केही सहज हुनेछ भन्ने अपेक्षा छ ।'
भरतपुर महानगरपालिकाकी प्रमुख रेनु दाहालले कोषका लागि २० लाख रुपैयाँको चेक पत्रकार महासंघलाई हस्तान्तरण गरिन् । महानगर प्रमुख दाहालले पत्रकारको सम्मानको कोषको व्यवस्था गरिएको बताइन् । यो सुरुवात हो , कोषको निरन्तरताको लागि हामी प्रतिबद्ध छौं,'उनले भनिन् ,' पत्रकारिता क्षेत्रबाट योगदान पुर्याउनेको सम्मान गरेका हौं।'
महानगर उपप्रमुख चित्रशेन अधिकारीले स्थानीय पत्रकारिताको क्षेत्रमा मुलुकभर भरतपुर महानगरले फरक कार्यक्रम गरेको बताए ।
महासघंले २० वर्ष काम गरेका र ६० वर्ष उमेर पुगेका ज्येष्ठ पत्रकारका लागि भत्ताको व्यवस्था गरिएको हो ।
कार्यविधिले तोकिएका चारजना पत्रकारले मंगलबार भत्ता पाए । पत्रकारहरु रेशम विरही , मोहन पोखरेल , डिल्लीराम पोखरेल , महेन्द्रराज श्रेष्ठले भत्ता पाएका छन् । बैशाखदेखि उनीहरुले भत्ता पाएका हुन ।
प्रतिक्रिया दिनुहोस !
