स्वास्थ्य मापदण्डमा लापरवाही : धरानका जनप्रतिनिधि नै पालना गर्दैनन् सरकारको निर्देशन

धरान : धरान उपमहानगरपालिकामा दैनिक कोरोना संक्रमितको संख्या वृद्धि भएको छ ।

कोरोना संक्रमितको संख्या बढ्दै गएपनि यसको रोकथाममा भने कसैले चासो देखाएको पाइदैन।

कोरोना नियन्त्रणको जिम्मेवारी लिएका स्थानीय निकायका जनप्रतिनिधिहरु समेत जिम्मेवार नबन्दा धरानमा कोरोना संक्रमितको संख्या बढ्दै गएको हो। 

सुनसरीमा २ सय १७ जनामा कोरोना संक्रमण देखिएको सुनसरीका प्रमुख जिल्ला अधिकारी इन्द्रदेव यादवले बताए । उनका अनुसार एकसय ८ जना संक्रमित निको भइसकेका छन् । धरान उपमहानगरपालिकामा ७६ जना संक्रमित भएको स्वास्थ्य महाशाखा प्रमुख उमेश मेहताले बताए । उपमहानगरपालिकामा हाल  ३२ जना संक्रमित छन् । 

धरानमा स्थानीय जनप्रतिनिधिहरुले कोरोना नियन्त्रणका लागि नेपाल सरकारले निर्धारण गरेको स्वास्थ्य मापदण्ड पालना नगरेको पाइएको छ ।

बुधबार उपमहानगरको कार्यपालिका बैठकमा मेयर हर्कराज राई (साम्पाङ), उपमेयर अइन्द्रविक्रम बेघा, प्रमुख प्रशासकीय अधिकृत उद्धव रिजाल र २० वटै वडाका वडाध्यक्षहरुले स्वास्थ्य मापदण्ड पालना कुनै ध्यान नदिएको पाइएको हो।

कार्यपालिका बैठकमा धरान १३ का वडाअध्यक्ष नेत्र काफ्ले, वडा नम्बर ६ का वडाअध्यक्ष भुपेन्द्र भट्टराई र १८ का वडाअध्यक्ष प्रविण राईले मात्र माक्स लगाएका थिए। तर उनीहरुले मुख नछोपी चिउडोमा माक्स लगाएका थिए । कार्यपालिकाको बैठकको अध्यक्षता गरिरहेका मेयर राईले तीनचोटी हाछ्युँ गर्दा शीरको टोपी झकेर मुख छोपेका थिए । 

जनप्रतिनिधिहरुले माक्स मात्र हैन स्वास्थ्य मापदण्ड विपरित चिया र खाजा खाएका थिए । कार्यपालिकाको बैठकमा समाचार संकलन गर्न पुगेका अधिकांश पत्रकारहरु पनि माक्स लगाएका थिएनन् । धरान उपमहानगरपालिकाका स्वास्थ्य शाखा प्रमुख उमेश मेहताले कोरोना नियन्त्रणमा सबैले अनिवार्य स्वास्थ्य मापदण्ड पालना गर्नुपर्ने बताए।

कोरोनाबाट सुनसरीको रामधुनी नगरपालिकाकी ५७ वर्षीया महिलाको निधन भएको छ । सुनसरीमा दिनप्रतिदिन कोरोना संक्रमितको संख्या वृद्धि भएपनि सर्वसाधारणले स्वास्थ्य मापदण्डमा चरम लापरवाही गरेका छन् । 

नेपाल सरकाले निर्देशन गरेको स्वास्थय मापदण्ड विपरित बजार, कलेज, विद्यालय र कार्यलयमा समेत अनावश्यक भीडभाड गर्ने, माक्स नलगाउने र सामाजिक दूरी कायम नगरेको पाइको छ । 

माक्स अनिवार्यरुपमा नलगाई निस्कन थालेपछि धरानमा कोरोनाको जोखिम बढेको स्वास्थ्य शाखा प्रमुख उमेश मेहताले बताए ।

कोरोना नियन्त्रणमा सरकार मात्र नभएर सबै नागरिक जिम्मेवार भइदिए कोरोना नियन्त्रणमा सहयोग पुग्ने उनको भनाइ छ । 

स्थानीय प्रशासन र प्रहरीले बजार अनुगमन र स्वास्थ्य मापदण्ड पालनामा कडाइ नगरेका कारण सुनसरीमा कोराना जोखिम बढेको स्थानीयको भनाइ छ । 

सुनसरीका प्रमुख जिल्ला अधिकारी यादवले सुनसरीमा कोरोना नियन्त्रणमा सबैले  स्वास्थ्य मापदण्ड पालना गर्नुपर्ने बताए । 

उनले जिल्लाका १२ वटै स्थानीय तह र मातहतका प्रहरी कार्यालय र सरोकारवाला सबैलाई स्वास्थ्य मापदण्ड पालना गर्न निर्देशन दिएको बताए । 

धरान उपमहानगरपालिकाका प्रमुख प्रशासकीय अधिकृत उद्धव रिजालले कार्यपालिकाको बैठकमा स्वास्थ्य  मापदण्ड पालना नगरिएको स्वीकार गर्दै आइन्दा सचेत हुने प्रतिबद्धता जनाए।