आन्दोलन चर्काउँदै बर्दिवासका शिक्षक, पुनरबहालीको माग गर्दै नगरपालिका घेराउ

 ढल्केवर(धनुषा) : महोत्तरीको बर्दिवास नगरपालिकाले करारका नगर शिक्षक हटाएपछि आन्दोलनमा होमिएका शिक्षकहरुले नगरपालिका कार्यालय घेराउ गरेका छन् । 

करार नविकरण गरी पुनरबहालीको माग गर्दै आइतबारदेखि आन्दोलनरत शिक्षकहरुले बिहीबार पाँचौं दिन नगरपालिकाको कामकाज ठप्प पारेका हुन् । 

नगरपालिकाको मूल गेट घेराउ गरेर बिहानैदेखि कार्यालयभित्र जनप्रतिनिधि तथा कर्मचारीहरुलाई प्रवेशमा रोक लगाइएको पीडित शिक्षक भिखारी दासले बताए । अहिले इलाका प्रहरी कार्यालय बर्दिवासबाट नगरपालिकामा सुरक्षाकर्मीको टोली पुगेको छ । आफूहरुको माग पूरा नभएसम्म आन्दोलन जारी राख्ने बर्दिवास नगर शिक्षक संघर्ष समितिका अध्यक्ष बलराम महतोको भनाइ छ ।

यता नगरपालिकाले भने उनीहरुको मागलाई वेवास्ता गर्दै नयाँ शिक्षक भर्नाका लगि सूचना आह्वान गरिसकेको छ । बर्दिवास नगरपालिकाका मेयर प्रह्लाद कुमार क्षेत्री ७८ जना करारका शिक्षक भर्नाका लागि दरखास्त आह्वान गरेकोले नयाँ प्रक्रियाद्वारा आउन आन्दोलनरत शिक्षकहरुलाई आग्रह गरेका छन् ।

बर्दिबासलाई शैक्षिक हव बनाउने अभियानमा विद्यालयहरुमा शिक्षकको कमी भएपछि पूर्वमेयर कार्कीले गत वर्ष खुल्ला प्रतिस्पर्धा मार्फत प्राथमिक तहदेखि माध्यमिक तहसम्मका ६२ जना करारका शिक्षक भर्ना गरेका थिए । तर, हाल निर्वाचित मेयर प्रह्लाद कुमार क्षेत्रीले करार शिक्षकहरुको म्याद झुक्कयाएर थप नगरेपछि उनीहरु आन्दोलित भएका हुन् ।

साउन २० गते नगरपालिकाको शिक्षा शाखाले एक सूचना जारी गर्दै करारका शिक्षकहरुलाई कामकाजमा नलगाउन सामुदायिक विद्यालयका प्रधानाध्यापकहरुलाई परिपत्र गरेपछि शिक्षकहरु मेयर क्षेत्रीप्रति क्रुद्ध बनेका छन् ।