कालिकोट : पुलको भार क्षमता परीक्षणका लागि कर्णाली राजमार्ग र कर्णाली करिडोर अवरुद्ध हुने भएको छ । निर्माण भएका पक्की पुलको भार क्षमता जाँच गर्नका लागि ३६ घण्टा कर्णाली राजमार्ग र कर्णाली करिडोर अवरुद्ध हुने भएको हो ।
कर्णाली राजमार्गअन्तर्गतको दैलेख आठबिस नगरपालिका–५ घट्टे खोला पुल र कर्णाली करिडोरअन्तर्गत कालिकोट नरहरिनाथ गाउँपालिका–८ स्थित कर्णाली नदीमा बनेको खुलालु पक्की पुलको लोड क्षमता जाँच गर्नका लागि ३६ घण्टा कर्णाली राजमार्ग र करिडोर अवरुद्ध हुने भएको छ ।
राजमार्गको घट्टे खोलामा बनेको पक्की पुलको भार क्षमता जाँच गर्नका बुधबार भदौ ८ गते बिहान ६ बजेदेखि करिब ३६ घण्टा बन्द भएको सडक डिभिजन जुम्लाका निमित्त कार्यालय प्रमुख विरेन्द्र रावलले बताए ।
पुलहरूको अनिवार्य रुपमा लोड क्षमताको परीक्षण गर्नुपर्ने भएकोले सडक बन्द गर्नु परेको हो । बुधबार बिहानदेखि कर्णाली राजमार्गस्थित घट्टे खोला पुलको भार परीक्षण भइरहेको छ ।
त्यस्तै, कर्णाली करिडोरअन्तर्गत कर्णाली नदीमाथि बनेको पुलको लोड परीक्षणका लागि आगामी भदौ ९ गते बिहान ६ बजेदेखि ३६ घण्टा राजमार्ग बन्द रहने सडक डिभिजन जुम्लाले जनाएको छ । प्राविधिक रूपले पुलको भार क्षमता जाँच गर्नुपर्ने व्यवस्था छ ।
पक्की पुलको टेष्टिङको समयमा कर्णाली राजमार्ग र कर्णाली करिडोरको दुवै तर्फको आवतजावत बन्द रहने र यात्रु सवारी साधनलाई आवतजावतका लागि त्यही अनुसार व्यवस्थापन गर्न समेत आग्रह गरिएको छ । ठूला क्षमाताका सवारी गुड्न थालेपछि दुर्घटनाको जोखिम छ ।
निमित्त प्रमुख रावलले भने, प्राविधिक दृष्टिले पनि पुलको भार जाँच्न जरुरी देखिएपछि छुट्टा छुट्टै समयमा ३६ घण्टा कर्णाली राजमार्ग र कर्णाली करिडोर बन्द गरेका हौँ ।'
प्रतिक्रिया दिनुहोस !
