उदयपुर : उदयपुरको बेलका नगरपालिका-७ का आफ्नै परिवारका तीन जनाको हत्या आरोपमा पक्राउ परेका ४३ वर्षीय नरबहादुर बस्नेतले आरोप स्वीकारेका छन्।
घरायसी रिसिवीकै कारण भाइबुहारी र भतिजलाई हत्या गरेको प्रहरी समक्ष उनले बयान दिएका हुन्। प्रारम्भिक बयानकै क्रममा आरोप स्वीकारेसँगै प्रहरीले आइतबार बस्नेतलाई पत्रकार सम्मेलन गरी सार्वजनिक गरेको हो।
शुक्रबार बिहान बेलका-७ मैनामैनीको गोवाटारस्थित बाबिङ खोला नजिकको खेततर्फ जाँदै गरेका ३७ वर्षीय भाइ राजकुमार बस्नेत, उनकी श्रीमती ३३ वर्षीया सरिता र १३ वर्षीय भतिज सुजनलाई धारिलो हतियार खुकुरी प्रहार गरी हत्या गरेको बयानमा स्वीकारेको जिल्ला प्रहरी कार्यालयका एसपी ज्ञानेन्द्र फुयाँलले बताए।
राजकुमारलाई बाटैमा खुकुरी हानेर ढालेपछि खेतमा पुगिसकेका सविता र खोलामा सुजनलाई त्यहीँ खुकुरी प्रहार गरी हत्या गरेको स्वीकार गरेका छन्। एकान्त ठाउँमा बिहान ११ बजे हत्या गरे पनि प्रहरीले घटनाको जानकारी करिब ३ बजे पाएको थियो।
जानकारी पाए लगत्तै इलाका प्रहरी कार्यालय रामपुरठोक्सिलाबाट परिचालित भएको प्रहरीको टोलीले बस्नेतलाई बेलका-६ को बरबोटेस्थित मदन भण्डारी लोकमार्गमा पैदल हिँडिरहेको अवस्थामा साँझ साढे ५ बजे पक्राउ गरिएको फुयाँलले बताए।
उनलाई प्रहरीले रगत लतपतिएको खुकुरी भिरेकै अवस्थामा भेटेको थियो।
पक्राउ परेका बस्नेतलाई शुक्रबार नै जिल्ला अदालत उदयपुरबाट ७ दिनको म्याद थप गरी मुलुकी अपराध संहिता २०७४ को ज्यानसम्बन्धी कसुरमा थप अनुसन्धान भइरहेको प्रहरीले जनाएको छ।
प्रतिक्रिया दिनुहोस !
