राष्ट्रिय महिला भलिबल प्रतियोगिता : पहिलो चरणको खेल सकियो

बेनी : नवौं राष्ट्रिय खेलकुद प्रतियोगिताअन्तर्गत महिला भलिबलको पहिलो चरणको प्रतिस्पिर्धा आइतबार सकिएको छ। 

राष्ट्रिय खेलकुद परिषदको आयोजनामा म्याग्दीको बेनीमा सञ्चालित प्रतियोगितामा मधेश र कर्णाली प्रदेश पहिलो चरणको खेलबाट बाहिरिएका छन्। 

लिक कम नकआउट वेष्ट अफ फाइभ सिस्टममा खेलाइएको खेलमा सात प्रदेश र तीन विभागीय टोली सहभागी छन्। 

आइतबार सशस्त्र प्रहरीले नेपाली सेनाको त्रिभुवन आर्मी क्लब र बागमती प्रदेशले मधेश प्रदेशलाई पराजित गरेका थिए। 

सशस्त्रले सेनालाई एकका विरुद्ध तीन र बागमतीले मधेशलाई सोझो तीन सेटले पराजित गरेको हो। खेलको पहिलो, तेस्रो र चौथो सेट सशस्त्र तथा दोस्रो सेट सेनाले जितेका थिए।  

विनिता बुढाथोकीको कप्तानीमा मैदानमा उत्रिएको सशस्त्रले सेनालाई पहिलो सेट २५-२०, तेस्रो सेट २५-२१ र चौथो सेट २५-२३ मा पराजित गरेको थियो। 

सशस्त्रका विरुद्ध २५-१९ ले दोस्रो सेट जितेको मनिषा खाँडको नेतृत्वमा रहेको सेनाको टोलीले उत्कृष्ट प्रर्दशन र कडा प्रतिस्पर्धा गरेपनि तेस्रो र चौथो सेट आफ्नो पक्षमा पार्न सकेनन्। 

ललिता महतको कप्तानीमा मैदानमा उत्रिएको बागमतीले प्रजुना थापाको नेतृत्वमा रहेको मधेश प्रदेशको टोलीलाई २५-६, २५-८ र २५-७ को फराकिलो अन्तरमा पराजित गर्‍यो। 

एपिएफकी निरुता ठगुल्ना र बागमतीकी जेनिसा विकलाई आइतबारको खेलमा वमेन अफ द म्याच घोषणा गरिएको छ। 

चार वटा समूहबाट आठ टीम क्वाटर फाइनल प्रवेश गरेका छन्। तीन/तीन टीम रहेको समूह (ए)बाट सशस्त्र र त्रिभुवन आर्मी तथा (वि)बाट बागमती र लुम्वीनी क्वाटर फाइनल प्रवेश गरेका भलिबलका राष्ट्रिय रेफ्रि विनय राईले जानकारी दिए। 

उनका अनुसार दुई/दुई टीम रहेको समूह (सि)बाट नेपाल पुलिस क्लब र (डि)बाट गण्डकी प्रदेश क्वाटर फाइनल प्रवेश गरेका छन्। 

सोमबारदेखि सुरु हुने क्वाटर फाइनलको पहिलो खेल समूह (ए)को विजयी सशस्त्र र समूह (सि)को उपविजेता लुम्वीनी प्रदेशबीच हुने जिल्ला भलिबल संघ म्याग्दीका अध्यक्ष तेजेन्द्र बानियाले बताए। 

समूह (बि)को विजयी बागमती र समूह (डि)को उपविजयी सुदूरपश्चिम तथा समूह (सि)को विजेता नेपाल पुलिस क्लब र समूह (ए) को उपविजेता सेनाको प्रतिस्पर्धा हुने उनले बताए। 

सोमबार नै क्वाटर फाइनलको अन्तिम खेल समूह डिको विजयी गण्डकी र समूह (बि)को उपविजेताबीच हुने भएको छ। प्रतियोगिता कात्तिक २ गतेसम्म सञ्चालन हुने जनाइएको छ।