आचारसंहिता मिचेर सत्ता गठबन्धनको चुनावी भेला
भोजपुर : भोजपुरमा आचारसंहिताको उल्लंघन गर्दै दलहरु चुनावी गतिविधिमा देखिएका छन् । प्रतिनिधि तथा प्रदेशसभा सदस्य निर्वाचन मिति नजिकिँदै जाँदा सत्तागठबन्धनका नेता तथा कार्यकर्ताहरु निर्वाचन आयोगले जारी गरेको आचारसंहिता मिचेर चुनावी भेला, कोणसभा तथा अगुवा कार्यकर्ता भेलामा लागेका हुन् ।
अगुवा कार्यकर्ता भेलाका क्रममा गठबन्धन दलहरुले चुनावी प्रचारका ब्यानर, तोरन, चुनाव चिन्हका सामाग्रीसहित चुनावी गतिविधी सुरु गरेका छन् । सामाजिक सञ्जालहरुमा गठबन्धनले चुनावी सामाग्रीसहित चुनावी समारोह गर्दै गरेको भेटिएको हो । निर्वाचन आयोगले कात्तिक १८ गतेभन्दा अगाडि कुनै पनि चुनाव प्रचारप्रसारका सामाग्रीको प्रयोग र ठूला सभा नगराउन आचारसंहिता लागू गरेपनि भोजपुरमा विपरीत गतिविधि सुरु भएको हो ।
निर्वाचन आचारसंहिता विपरीत गठबन्धनले रामप्रसादराई गाउँपालिकाको बैकुण्ठेमा २९ गते, टेम्केमैयुङ गाउँपालिकाको अन्नपूर्णमा ३० गते र पौवादुङमा गाउँपालिकाको च्याङग्रेमा ३१ गते गरेको अगुवा कार्यकर्ता भेलामा चुनाव चिन्हसहित झण्डा, तोरन, फ्लेक्स प्रिन्ट ब्यानर र उम्मेदवार चढ्ने गाडिमा चुनावचिन्हसहितको झण्डा भेटिएको हो । कार्तिक १८ गतेबाट चुनावी गतिविधि गर्न आचारसंहिता रहेपनि चुनावी गतिविधी सुरु भएको प्रमुख जिल्ला अधिकारी हरिप्रसाद घिमिरेले बताए ।
यसपटक भोजपुरमा वाम तथा लोकतान्त्रिक गठबन्धन र नेकपा (एमाले) बीच कडा चुनावी भीडन्त हुँदैछ । आसन्न चुनावमा प्रतिनिधिसभातर्फ गठबन्धनबाट सुदन किराती र नेकपा एमालेका शेरधन राई आमुन्नेसामुन्ने हुँदैछन् । यस्तै प्रदेशसभा सदस्य क्षेत्र नं १ तर्फ गठबन्धनका राजेन्द्रकुमार राई र नेकपा एमालेका हरिबहादुर राई, प्रदेशसभा सदस्य क्षेत्र नं. २ तर्फ गठबन्धनका विनोद वान्तावा र नेकपा एमाले खड्गबहादुर कार्कीबीच कडा प्रतिस्पर्धा हुने देखिएको छ । भोजपुरमा कुल १ लाख २३ हजार तीनसय ७९ मतदाता रहेका छन् ।