रामेछाप कांग्रेसका बागी उम्मेदवार राउतको कान्छारामलाई समर्थन
रामेछाप : पार्टीप्रति असन्तुष्टि जनाउँदै गत असोज २३ गते स्वतन्त्र उम्मेदवारी दर्ता गराएका नेपाली कांग्रेस रामेछापका पूर्वसचीव चन्द्रबहादुर राउतले गठबन्धनका उम्मेदवार नेपाली कांग्रेस रामेछापका सभापति पूर्णबहादुर तामाङ ( कान्छाराम) लाई समर्थन गर्ने भएका छन् ।
नेपाली कांग्रेसमा आफ्नो रगत पसिना बगाएको र आफू पार्टीको जिम्मेवार व्यक्ति भएकाले अन्तिम घडीमा पार्टीलाई धोका नदिने भन्दै आफ्नो उम्मेदवारी निष्क्रिय पारेको र आफ्नो क्यामेरा चिन्हमा मतदान नगर्न आग्रह गरेका छन् ।
जिल्ला सदरमुकाम मन्थलीमा पत्रकार सम्मेलनको आयोजना गर्दै राउतले पार्टी प्रतिको विमति कायम रहे पनि हाललाई आफ्नो उम्मेदवारी नरहेको र पूर्णबहादुर कान्छारामलाई समर्थन गरेको जनाएका छन् ।
आफू लामो समयदेखि जिल्ला पार्टीको महत्त्वपूर्ण पदमा रहेर काम गरेको र नेपाली कांग्रेसलाई जिताउनुपर्ने अवस्थालाई मध्यनजर गर्दै आफ्नो उम्मेदवारी निष्क्रिय रहेको राउतद्वारा जारी विज्ञप्तिमा उल्लेख छ ।
राउतले निर्वाचन आयोगले आफूलाई प्रदान गरेको क्यामेरा चिन्हमा मतदान नगरी पार्टीको उम्मेदवारलाई रुख चिन्हमा मतदान गर्न आग्रह गरेका छन् । राउतलाई जिल्लाका अधिकांश नेता तथा कार्यकर्ताले धेरै आग्रह गरेपछि आफ्नो उमेदवारी निष्क्रिय रहेको बताएका छन् ।
राउतलाई पार्टीले उचित स्थान दिने र सम्मान गर्ने संघीय सांसदका उम्मेदवार कान्छारामले प्रतिबद्धता व्यक्त गरेका छन् ।