परासी : स्थानीय तहको चुनावी अंक गणितअनुसार नवलपरासीका चार प्रदेशसभा निर्वाचन क्षेत्रमध्ये तीन निर्वाचन क्षेत्रमा गठबन्धनका उम्मेदवार अघि देखिएका छन् । जिल्लामा दुई निर्वाचन क्षेत्र छन् ।
निर्वाचन क्षेत्र नं. १ को ‘ख’मा जनता प्रगतिशील पार्टी (जप्रपा) र जनता समाजवादी पार्टी (जसपा) को सहयोगमा उठेका एमालेका उम्मेदवार अघि देखिएका छन् । बाँकी सबैमा गठबन्धनका उम्मेदवार अघि देखिएका हुन् । स्थानीय तहको निर्वाचनमा देखिएको मत परिणामको अवस्था यथावत रहने अवस्था भने छैन । मंसिर ४ गते हुने चुनावमा जिल्लाका चारवटै प्रदेशसभा निर्वाचन क्षेत्रमा सत्ता गठबन्धन दलबीच नै एकमत छैन । कुनै निर्वाचन क्षेत्रमा सत्ता गठबन्धनकै घटकले एकअर्का विरुद्ध उम्मेदवारी दिएका छन्, भने उम्मेदवारी नदिएका क्षेत्रमा पनि सम्बन्ध राम्रो देखिएको छैन । अन्य दलहरुले पनि तालमेल गरेर चुनावमा उत्रिएकाले गठबन्धनसँग कडा प्रतिस्पर्धा छ ।
निर्वाचन क्षेत्र नं. १ को प्रदेशसभा‘क’मा गठबन्धन एकीकृत समाजवादी(एस)बाहेक गठबन्धनको सहयोगमा नेपाली कांग्रेसका विश्वप्रेम पाठकले उम्मेदवारी दिएका छन् । । त्यहाँ एककीकृत समाजवादीले उम्मेदवारी दिएको छ । पाठकसँग जप्रपा तथा जसपाको सहयोगमा उम्मेदवार बनेका एमालेका उम्मेदवार पुण्य प्रसाद पौडेलबीच प्रतिस्पर्धा छ । स्थानीय तहको मतअनुसार त्यहाँ कांग्रेसका पाठक एमालेका पौडेलभन्दा ३ हजार ६४८ मतले अघि छन् । त्यस क्षेत्र मा ८ राजनीतिक दल र ८ स्वतन्त्र गरी १६ जनाले प्रदेशसभा सदस्यमा उम्मेदवारी दिएका छन् ।
त्यस्तै प्रदेशसभा ‘ख’ मा गठबन्धन घटकका माओवादी केन्द्र र कांग्रेसका दुबै उम्मेदवारले उम्मेदवारी दिएका छन् । कांग्रेसबाट देवकरण कलवार र माओवादीबाट रामानन्द यादवले उम्मेदवारी दिएका छन् । गठबन्धनबाट माओवादीको मत आफ्नै उम्मेदवारलाई जाने छ । एमालेबाट दीपकराज शर्माले उम्मेदवारी दिएका छन् ।
एमालेलाई जप्रपा र जसपाले समर्थन गरेको छ । स्थानीय तहको निर्वाचनअनुसार कांग्रेसका उम्मेदवार कलवारभन्दा एमालेका उम्मेदवार शर्मा ५ हजार ६४९ मतले अघि देखिएका छन् । स्थानीय तहमा माओवादीले त्यस क्षेत्रमा २ हजार ९३३ मत पाएको छ । त्यस क्षेत्रमा ८ राजनीतिक दल र ३ स्वतन्त्र गरी ११ जनाले प्रदेशसभा सदस्यमा उम्मेदवारी दिएका छन् ।
त्यसैगरी निर्वाचन क्षेत्र नं. २ को प्रदेशसभा ‘क’मा स्थानीय तहको मतअनुसार नेपाली कांग्रेसको गठबन्धनमा उम्मेदवारी दिएका माओवादी केन्द्रका चिनक कुर्मी झिनो मतले अघि छन् । जप्रपा र जसपाले समर्थन गरेका एमालेका थान प्रसाद गैरेभन्दा जम्मा १ सय मतले कुर्मी अघि देखिएका छन् । त्यस क्षेत्रमा ७ राजनीतिक दल र ४ स्वतन्त्र गरी ११ जनाले प्रदेशसभा सदस्यमा उम्मेदवारी दिएका छन् ।
त्यसैगरी स्थानीय तहको मतअनुसार त्यस निर्वाचन क्षेत्रको प्रदेशसभा ‘ख’ मा गठबन्धनबाट उम्मेदवारी दिएका बैजनाथ कलवार र एमाले र जप्रपाको सहयोगमा उम्मेदवारी दिएका जनता समाजवादी पार्टीका धरेन्द्र यादवभन्दा २ हजार ९७१ मतले अघि छन् ।
त्यस निर्वाचन क्षेत्रमा ७ राजनीतिक दल र ७ स्वतन्त्र गरी कुल १४ जनाले प्रदेशसभा सदस्यमा उम्मेदवारी दिएका छन् । स्थानीय तहको मत अनुसारको अंक गणित जस्तो सुकै देखिएपनि स्थानीय चुनावी माहोल भने भिन्न छ । केही प्रदेशसभाका निर्वाचन क्षेत्रमा स्वतन्त्रसहित राप्रपा, लोसपाका उम्मेदवारको चुनावी माहोल पनि राम्रो देखिएको छ ।
प्रतिक्रिया दिनुहोस !
