भैरहवा : रुपन्देहीको निर्वाचन क्षेत्र नम्बर ३ को मतगणनामा गृहमन्त्री बालकृष्ण खाणले अग्रता कायम राखेका छन्।
रुपन्देही-३ मा प्रतिनिधिसभा सदस्य पदमा पाँच दलीय गठबन्धनको तर्फबाट नेपाली कांग्रेसका केन्द्रीय सदस्य खाण र तीन दलीय तर्फबाट राप्रपाका वरिष्ठ नेता दीपक बोहरासहित २२ जना उम्मेदवार प्रतिस्पर्धामा छन्।
रुपन्देही-३ प्रतिनिधि सभा सदस्यको सोमबार दिउँसो देखि मतगणना सुरु भएको हो। मतगणना सुरु भएदेखि खाणले अग्रता कायम राखेका छन्। मंगलबार दिउँसो राप्रपाका बोहराले अग्रता लिएपनि खाणले पुन: बोहरालाई पछि पार्दै ४ सय १५ मतले आफ्नो अग्रता कायम राखेका छन्।
रुपन्देहीको मुख्य निर्वाचन अधिकृतको कार्यालय अनुसार रुपन्देही क्षेत्र ३ को प्रतिनिधिसभाको १९ हजार १ सय ५१ मतगणना हुदा खाणले सात हजार तीन सय ३८ मत प्राप्त गर्दा बोहराले ६ हजार नौ सय २३ मत प्राप्त गरेका छन्।
हाल सम्म रुपन्देही क्षेत्र नम्बर ३ अन्तर्गत मायादेवी गाउँपालिका वडा नम्बर ७ र ८, तिलोत्तमा नगरपालिका वडा नम्बर १४, ओमसतिया गाउँपालिका वडा नम्बर २, सियारी गाउँपालिका वडा नम्बर १, सिद्धार्थनगर नगरपालिकाको वडा नम्बर १ र २ को मतगणना भएको छ।
प्रतिक्रिया दिनुहोस !
