भेटिएको सय मतपत्र बदर गर्ने निर्णय : एमाले लगायतका २० उमेदवारद्वारा गणना बहिस्कार
मंसिर १३, २०७९ मंगलबार १०:५२:०
उदयपुर : प्रतिनिसभा सदस्यको मतपेटिकामा प्रदेशसभा सदस्यको भेटिएको मतपत्र गणना नगर्ने निर्णयसँगै नेकपा एमाले लगायतका बीस जना उमेदवारले मतगणना बहिस्कार गरेका छन् ।
मंगलबार बिहान मुख्यनिर्वाचन अधिकृत कृष्णप्रसाद सुवेदीले भेटिएको सय थान मतपत्र बदर गर्ने निर्णय सुनाएसँगै एमाले लगायतका दलहरुले गणना बहिस्कार गरेका हुन् । गणना बहिस्कार गर्दै नाराजुलुससहित निस्किएका एमाले कार्यकर्ताले मुख्यनिर्वाचन अधिकृतलाई सत्ताको चरम दुरुपयोग गरेको आरोप लगाएका छन् ।
एमाले अध्यक्ष परमेश्वर घिमिरेले मतगणना पूर्व मंसिर ५ गते भएको सर्वदलीय बैठकको निर्णय अनुसार अन्य मतपेटिकामा भेटिएको मतपत्र मुख्यनिर्वाचन अधिकृतले नै गणना नगर्ने निर्णय सुनाउनुले स्वतन्त्र न्याय दिन नसकको आरोप लगाए । उनले पुनः मतदान गर्नु पर्ने एमालेको बटमलाईन यथावत रहेको बताए । एमालेले पुनः मतदानको माग गर्दै निर्वाचन आयोगमा निवेदनसमेत दिएको छ ।
न्यायाधिशविरुद्ध चर्को नारावाजीसहित गणना स्थलबाट वाहिरिएका एमाले कार्यकर्ताले दिउँसो आन्दोलन गर्ने तयारी गरेको छ । यता एमालेसहितका उमेदवार बाहिरिएपछि मुख्यनिर्वाचन अधिकृतले गणना कार्य सुरु गरेका छन् । पटक–पटक मतगणनाका लागि प्रतिनिधि पठाई दिन आग्रह गर्दा उमेदवारले प्रतिनिधि नपठाएपछि गणना कार्य सुरु गरिएको मुख्यनिर्वाचन अधिकृत सुवेदीले बताए ।
उनले भने, ‘हामीले प्रतिनिधि पठाइदिनु भनेका छौं, ज–जसले पठाउनु भयो त्यहीँ अनुसार गणना सुरु गरेका हौं।' गणनाका लागि अहिलेसम्म नेपाली कांग्रेस र राष्ट्रिय स्वतन्त्र पार्टीले मात्र प्रतिनिधि पठाएको छ बाँकी उमेदवारले बहिस्कार गरी गणना स्थल छोडेका छन्।
मतगणना सुचारु गर्न पटक–पटक बसेको सर्वदलीय बैठकबिना निष्क्रिय टुङ्गिएपछि मुख्यनिर्वाचन अधिकृतले मंगलबार यस्तो निर्णय गरेका हुन् । गणना कार्य स्थगित हुनुको कारणसहित निर्वाचन आयोगलाई निर्णयका लागि पठाइएको पत्रको जवाफमा मुख्यनिर्वाचन अधिकारीलाई निर्णय गर्ने अधिकार प्रत्यायोजन गरेको थियो । एमालेले भेटिएको प्रदेशसभाको मतपत्र गणना गर्नु पर्ने अडान राखिरहँदा कांग्रेसले गणना गर्न नहुने अडान राखेको थियो ।
आइतबार मतगणनाका क्रममा पछिल्लो पटक खोलिएको १० वटा मतपेटिकामा उदयपुर १ (२) प्रदेश सभाको १ सय मत पत्र भेटिएपछि गणना रोकिएको थियो । ६३ हजार ८० मत गणना भइसकेपछि थप गणनाका लागि १० वटा मतपेटिका खोल्दा प्रदेशतर्फको एक सय वटा मतपत्र भेटिएको थियो ।
७६ हजार ७५६ मत खसएको यो क्षेत्रको ६३ हजार ८० मत गणना भइसकेको छ । गणना भइसकेकोमा कांग्रेस उम्मेदवार नारायण खड्काले १ हजार ८२५ मतले अग्रता लिएका छ्न्। खड्काले २७ हजार ४८४ मत प्राप्त गरेका छ्न् भने एमालेकी मन्जुकुमारी चौधरिले २५ हजार ६५९ मत प्राप्त गरेको निर्वाचन अधिकृतको कार्यलयले जनाएको छ ।
प्रतिक्रिया दिनुहोस !
