सोलुखुम्बु : सोलुखुम्बुको जिल्ला सामुदायिक आँखा केन्द्र फाप्लुले १ हजार ७ सय बढी विद्यार्थीको आँखा जाँच गरेको छ।
केन्द्रले विद्यालय आँखा जाँच कार्यक्रममार्फत सोलुदुधकुण्ड नगरपालिकाको ९ वटा विद्यालयमा सञ्चालन गरेको शिविरमार्फत १ हजार ७ सय १४ जना विद्यार्थीको आँखा जाँच गरिएको हो।
जसमध्ये ८६७ छात्रा र ८४७ जना छात्र रहेको आँखा केन्द्रका प्रमुख विधान ताम्राकारले जानकारी दिए। उनका अनुसार पिके मावि लोदिङका १०४, जुनबेशी मावि जुनबेशीका १०२, बालेश्वर मावि केरुङका १३५, सेर्कासिङ आवि नाजिङका ५९ र फाप्लु सामुदायिक आवि फाप्लुका १८१ जनाले सेवा लिएका छन्।
यस्तै जनप्रिय मावि टाप्टिङका २४५, फाप्लु सामुदायिक मावि फाप्लुका ११५, जनजागृति आवि सल्लेरीका १६९ र ह्वाईहिल्स मावि सल्लेरीका ६०४ जना विद्यार्थीको आँखा जाँच गरिएको केन्द्रको तथ्यांक छ।
यसैगरी गत मंसिर २५ देखि पुस ७ गतेसम्म विद्यालयमा पुगेर सञ्चालन गरिएको शिविर मार्फत १५५ जनालाई चस्मा लगाउन सुझाव दिइएको आँखा कार्यकर्ता दिनेश राईले बताए।
उक्त शिविर तिलगंगा आँखा प्रतिष्ठान काठमाण्डौँ, हिमालयन क्याटर्याक प्रोजेक्ट र सोलुदुधकु्ण्ड नगरपालिका शिक्षा शाखाको समन्वयमा सञ्चालन गरिएको जिल्ला सामुदायिक आँखा केन्द्र फाप्लुले जनाएको छ।
प्रतिक्रिया दिनुहोस !
