सिमकोट : हुम्ला सिमकोट गाउँपालिकाले गर्भवती र सुत्केरीका लागि ‘पोषण थैली’ उपहार दिन सुरु गरेको छ।
सुनौलो हजार दिनका महिलाको पोषणमा सुधार ल्याउन हुम्लाको सिमकोट गाउँपालिकाले ‘पोषण थैली’ वितरण सुरु गरेको हो।
पोषण नपुगेर गर्भवती र सुत्केरी महिलाहरूको स्वास्थ्य अवस्था बिग्रदै जाने गरेका कारण गाउँपालिकाले चालु आर्थिक वर्षबाट सुरु गरेको नयाँ कार्यक्रम ‘अध्यक्ष उपाध्यक्ष ल्याउँदै छन् कोशेली, गर्भवती र सुत्केरीलाई पोषण थैली’ भन्ने नाराका साथ सुनौलो हजार दिनका आमाहरूलाई पोषणयुक्त खाद्यन्न समावेश गरेको पोषण थैली वितरण गरिएको गाउँपालिकाका अध्यक्ष बीजय भण्डारी (प्ररिोध)ले जानकारी दिए।
गाउँपालिकाले वडा नम्बर २ ठेहेमा भएको स्वास्थ्य चौकीमा एक विशेष कार्यक्रमको आयोजना गर्दै पोषण थैली वितरण कार्यक्रमको सुरु गरेको हो।
आज वडाका १० जना गर्भवति र सुत्केरीलाई ‘पोषण थैली’ वितरण गरिएको ठेहे स्वास्थ्य चौकीका इन्चार्ज दानबहादुर बोहराले जानकारी दिए।
पोषणा थैलीमा पालिकाले ४ पोका तेल, १ क्यारेट अण्डा, ५ वटा कपडा धुने साबुन, ५ वटा नुहाउने सावुन, ५ केजी रातो चामल, आधा किलो घ्यू, महिलाका लागि कपडा, एउटा ग्रीन हाउसको पाल, तरकारीको बिउ, नङकट, ब्रस, मञ्जन लगायतका सामग्री समावेश छ।
प्रतिक्रिया दिनुहोस !
