वीरगन्ज : वीरगन्जको एक मनिट्रान्सफरको रकम लिएर फरार भएका तीनजना युवकलाई प्रहरीले पक्राउ गरेको छ ।
पक्राउ पर्नेहरुमा वीरगन्ज महानगरपालिका वडा नम्बर १० का २२ वर्षीय आकाश साह,२२ वर्षीय,संजय साह र २१ वर्षीय महम्मद सकिर मियाँ रहेका छन् । प्रहरीका अनुसार वीरगन्ज १० स्थित दुर्गे मनि ट्रान्सफर प्रालिका सञ्चालक विजय साह सर्राफले मङगलबार ४ लाख १४ हजार ८ सय रुपैयाँ कृषि विकास बैंकमा जम्मा गराउन पठाएका तीन युवक रकम जम्मा नगरी फरार भएका थिए ।
सञ्चालक सर्राफले यसबारे प्रहरीमा उजुरी दिएपछि प्रहरी निरीक्षक प्रज्वल थपलियाको नेतृत्वमा खटिएको टोलीले तीनै जना युवकलाई वीरगन्ज १० बाटै पक्राउ गरेको पर्साका प्रहरी उपरीक्षक कोमल साहले जानकारी दिए ।
उनीहरुको साथबाट २ लाख २३ हजार ५ सय रुपैयाँ बरामद भएको पनि उनले बताए । पक्राउ परेका तीनै जनाविरुद्ध बुधबार पर्सा जिल्ला अदालतबाट ठगी, अपराधिक विश्वासघात तथा अपराधिक लाभ (एक्सटर्सन ) सम्बन्धी कसूरमा ४ दिनको म्याद थप गरी अनुसन्धान भइरहेको शाहले जानकारी दिए ।
प्रतिक्रिया दिनुहोस !
