दक्षिण कोरिया

सधैं सबेरै उठ्छ कोरिया 

मिनेटभरमैं हातमुख धुन्छ 
हेर्छ– पूर्वतिर  
दुगुर्छ– पश्चिम दिशा 
उसलाई भेट्नु छ त्यो चन्द्रमा 
जापानभन्दा पहिले ।
  
त्यसैले पुग्छ–
एसियाका गल्ली–गल्ली  
मजदुरहरू खोज्दै  
कहिले पुग्छ–
बीटीएसका हिट गीत भएर त्यतै 
बेच्छ–
सामसुङका आइटमहरू डलरमा
उसलाई किन्नु छ–
मंगल ग्रहमा  
एलेन मक्सका प्लटिङ भिटा ।

राखेर तैनाथ अमेरिकी सैनिक 
पिएर निदाउँछ माकल्ली साँझ 
तर, लर्खराउँदैन कतै 

उसको लठ्ठी हो–
एसियाका आप्रवासी मजदुरहरू ।