विशेषज्ञ स्वास्थ्य सेवाको आधारभूत र आकस्मिक सेवा प्रदान गर्न प्रशिक्षक तयार

काठमाडौं : बाग्मती प्रदेश स्वास्थ्य तालिम केन्द्रको आयोजनामा प्रदेशका सबै १३ जिल्लामा रहेका अस्पतालका चिकित्सक, पालिकाका स्वास्थ्य संयोजक र स्वास्थ्य कार्यालयका फोकल पर्सन तथा स्वास्थ्यकर्मीलाई ३ दिने तालिम प्रदान गरिएको छ । 

सेवा प्रवाह गर्नका लागि ३ ब्याच गरी ७१ जनालाई ३ दिने प्रशिक्षक प्रशिक्षण तालिम बानेश्वरमा सञ्चालन गरिएको थियो । कार्यक्रमको शुभारम्भ तथा समापन कार्यक्रम मास्टर ट्रेनर तथा केन्द्रीय कारागार अस्पतालका प्रमुख मेडिकल सुपरिटेन्डेन्ट डा. प्रकाश बुढाथोकीको प्रमुख आतिथ्यता, बाग्मती स्वास्थ्य तालिम केन्द्रका निर्देशक डा. भुवन पौडेलको अध्यक्षतामा ब. स्वास्थ्य शिक्षा अधिकृत रागीश्री कक्षपतिले सञ्चालन गरेका थिए। 

प्रशिक्षक प्रशिक्षण तालिममा मुख स्वास्थ्यतर्फ चिकित्सकद्धय डा. प्रकाश बुढाथोकी र डा. रन्जिता श्रेष्ठ ,आँखा स्वास्थ्यतर्फ नेत्ररोग विशेषज्ञ डा.सविना श्रेष्ठ र अपराजिता मनोरन्जन र नाक कान घाँटीतर्फ डा. योगेश न्यौपाने र डा.साहारा अधिकारी तथा सहजीकरणका तरिका र विधि बारेमा स्वास्थ्य तालिम केन्द्रकी रागीश्री कक्षपतिले प्रशिक्षण दिएकी थिइन्।

  
प्रमुख प्रशिक्षक तथा प्रमुख अतिथि डा. बुढाथोकीले ओझेलमा परेको क्षेत्रलाई सम्बोधन गर्दे शाखा स्थापना भएको र हामी सबै मिलेर यसको विकास र विस्तार गर्नुपर्नेमा जोड दिएका थिए। डा. बुढाथोकीले स्थानीय र प्रदेश सरकारलाई सशर्त बजेटका रुपमा कार्यक्रम राखिएकाले त्यो कार्यान्वयन गर्न तथा आफूले पनि बजेटमा प्राथमिकता दिई राख्न अनुरोध गरे।
 
प्रमुख कन्सल्टेन्ट डेन्टल सर्जन डा. प्रकाश बुढाथोकीले प्याकेज कार्यक्रमको विकासक्रम, तालिम तथा अभिमुखीकरण कार्यक्रमका उदेश्यका बारेमा उल्लेख गरेका थिए।अब संविधानप्रदत्त गुणस्तरीय स्वास्थ्य सेवा, आधारभूत स्वास्थ्य सेवा तथा आकस्मिक स्वास्थ्य सेवामा यी सेवा समाहित गरिसकिएकोले तथा त्यस्को स्तरीय उपचार पद्धति पनि निर्माण भइसकेकाले अध्ययन गरी हरेक स्वास्थ्य संस्थाहरुले सेवा एकरुपताका साथ  गुणस्तर र सहजरुपमा दिनपर्ने र उचित समयमा र उपयुक्त स्थानमा प्रेषण गर्नुपर्ने बताए। 

सरकारबाट ओझेल तथा विज्ञ अभाव झेलिरहेका उपरोक्त सेवाहरुमा सबै स्वास्थ्यसंस्थामा बिज्ञ खटाउन तथा पठाउन नसकिने र नसकिरहेका बेलो हरेक नेपालीलाई सेवाको पहुँचमा ल्याउन संघीय सरकारबाट भएका यस्ता तालिम सहायकसिद्ध हुने भन्दै सबै सहभागीलाई तालिमको भरपुर सदुपयोग गर्न अनुरोध गरेका थिए।  
 
कार्यक्रममा तालिम केन्द्रका निर्देशक डा. पौडेलले प्रदेशका हरेक स्वास्थ्यसंस्थाबाट सेवा प्रदान गर्ने गरी प्रशिक्षक तयार पार्न तालिम सञ्चालन भएकोमा खुशी व्यक्त गर्दै तालिमलाई ब्यवहारत कार्यरत संस्थामा कार्यान्वयनमा ल्याउन भने। तालिमका योजनाकार, जन्मदाता डा. बुढाथोकी र प्रशिक्षकहरु ख्यातीप्राप्त विषय विज्ञहरु नै आएकाले हामीलाई थप उर्जा मिलेको बताए। 

आधारभूत स्वास्थ्य सेवा तथा आकस्मिक स्वास्थ्य सेवामा समाहित भइसकेका विशेषज्ञ सेवाहरु सरकारको तल्लो स्वास्थ्यसंस्था र स्वास्थ्यकर्मीसम्म पुर्‍याउनलाई कुनै चुनौती नरहेको भन्दै विस्तृतीकरण गरिएको थियो । समापन कार्यक्रममा सहभागीलाई प्रमुख अतिथिबाट प्रमाणपत्र र निर्देशन दिंदै जिल्लाका र स्थानीय तहका स्वास्थ्यकर्मीहरुलाई सेवा प्रवाहमा सहजीकरण गर्न अनुरोध गरिएको थियो।