फिदिम : पाँचथरको फालेलुङ गाउँपालिका-३ थकेपुङमा आगलागी हुँदा तीन घर जलेर खरानी भएका छन्।
आइतबार दिउँसो भएको उक्त आगलागीबाट ५४ लाख ३० हजार बराबरको क्षति भएको प्रारम्भिक अनुमान गरिएको छ।
महेन्द्र मादेन, कृष्ण मादेन र मनबहादुर मादेनको घरमा आगलागी भएको हो। महेन्द्रको घरबाट सुरु भएको आगोले उनका दाजुहरू कृष्ण र मनबहादुरको घर समेत खरानी बनाएको जिल्ला प्रहरी कार्यालय पाँचथरका प्रहरी नायब उपरीक्षक हरी खतिवडाले जानकारी दिए।
आगलागीबाट महेन्द्रको २२ लाख ७५ हजार, कृष्णको ३१ लाख पाँच हजार र मनबहादुरको ५० हजार मूल्य बराबरको घरसहित धनमाल जलेर नष्ट भएको प्रारम्भिक अनुमान छ।
दिउँसो २ बजेबाट सुरु भएको आगलागी नियन्त्रणका लागि इलाका प्रहरी कार्यालय मेमेङका प्रहरी नायव निरीक्षक बेदबहादुर खड्काको कमाण्डमा प्रहरी टोली खटेको थियो। प्रहरी र स्थानीयले दिउँसो तीन बजे आगो नियन्त्रणमा लिएको प्रहरीको भनाइ छ।
प्रतिक्रिया दिनुहोस !
