स्याङ्जा : पुतलीबजार नगरपालिका पूर्ण खोप सुनिश्चतता तथा दिगोपना पालिका घोषित भएको छ।
मंगलबार नगरपालिकामा आयोजित कार्यक्रम मार्फत जिल्ला समन्वय समिति प्रमुख श्रीप्रसाद जिटीले सो घोषणा गरे।
घोषणा गर्दै प्रमुख जिटीले भने, ‘यस्ता अभियानले प्रत्येक वर्ष निरन्तरता पाइरहनुपर्छ। मातृ र शिशु मृत्युदर घटाउन र बालबालिकाको नैसर्गिक अधिकारभित्र रहेको खो पाउने अधिकारलाई राज्यले ध्यान दिनुपर्छ।’ राज्यले स्वास्थ्य, शिक्षा र सुरक्षाको जिम्मा लिनुपर्ने उनले बताए।
चालु आवमा पुतलीबजार नगरपालिका अन्तर्गत १४ वटा वडाका १६ देखि २३ महिनाभित्रका ३ सय ५३ बालबालिकाले पूर्ण खोप पाएका छन्। नगरपालिकाले ३ सय ७७ को लक्ष्य थियो। बालबालिकालाई १३ वटा रोग बिरुद्धका ७ वटा खोपका मात्रा पूरा भएपछि नगरपालिकालाई पूर्ण खोप सुनिश्चतता पालिका घोषणा गरिएको नगरप्रमुख तुलसीराम रेग्मीले जानकारी दिए।
नगर उपप्रमुख देवी अर्याल, प्रमुख प्रशासकीय अधिकृत हरिराम नागिला, वरिष्ठ जनस्वास्थ्य अधिकृत वसुन्धरा शर्मा, वडाअध्यक्ष एवं सामाजिक विकास संयोजक इमबहादुर सेन, स्वास्थ्य अधिकृत ईश्वर थापा, जनस्वास्थ्य निरीक्षक नविनराज मरासिनी, टक्सार स्वास्थ्य चौकी प्रमुख कृष्णप्रसाद च्वाईं लगायतले खोपको आवश्यकता र स्वास्थ्यमा राज्यको सरल नीति नियम र बजेट बढाउनु पर्नेमा जोड दिए। दिगो विकास लक्ष्य अनुरुप सन २०३० सम्ममा ५ वर्षमुनिको मृत्युदर शून्यमा झार्ने लक्ष्य छ।
अझै पनि नेपालमा ८० प्रतिशत बालबालिकाले पूर्णे र १६ प्रतिशतले आंशिक खोप पाएका छन्। तर, ४ प्रतिशत बालबालिका भने अझै खोपबाट वंचित रहेको जनस्वास्थ्य अधिकृत अनिषा सुवेदीले बताइन्।
सोही कार्यक्रममा नगरपालिकालाई पूर्ण खोप सुनिश्चतता बनाउने कार्यलाई कार्यान्वयन गरेको भन्दै जिल्ला स्तरीय खोप समन्वय समितिले पुतलीबजार नगरप्रमुख तुलसीराम रेग्मीलाई सम्मान गरेको छ।
यसैगरी नगरपालिकाले १४ वटै वडा कार्यालयका वडाअध्यक्ष, स्वास्थ्य प्रमुख र स्वास्थ्यकर्मीलाई पनि सम्मान गरेको छ।
प्रतिक्रिया दिनुहोस !
