सांसद्लाई सभामुखको आग्रह : एकले अर्काविरुद्ध जुहारी नखेल्नुस्

काठमाडौं : प्रतिनिधिसभा सभामुख देवराज घिमिरेले सांसद्हरूले संसदीय प्रणालीको अक्षरश पालना गर्न निर्देशन दिएका छन् । संसद्मा भ्रष्टाचार र नक्कली भुटानी शरणार्थी प्रकरणमा सत्तापक्ष र प्रतिपक्षबीच जुहारी चलेपछि सभामुख घिमिरेले संसदीय पद्यतिको अवलम्बन गर्न निर्देशन दिएका हुन् ।

संसद्मा नक्कली भुटानी शरणार्थी प्रकरणका विषयमा बोल्दै गर्दा नेकपा माओवादी केन्द्रका सांसद् माधव सापकोटाले एमालेले छापामार शैलीमा संसद् कब्जा गर्न खोजेको आरोप लगाएका थिए । उनले टोपबहादुर रायमाझीलाई पक्रनका लागि सहयोग गर्न एमालेलाई आग्रह गरे ।

सो क्रममा एमाले सांसद् आक्रोशीत बनेका थिए । यस्तै सांसद्हरू बोल्न पाउनुपर्ने माग गर्दै रोष्ट्रम अघि उभिएका थिए । लगत्तै सभामुख घिमिरेले एकले अर्काविरुद्ध जुहारी नखेल्न आग्रह गरे । घिमिरेले भने, ‘यसरी संसद्को कार्यसूची अघि जान सक्दैन । माननीय सदस्यज्यूहरू कार्यसूचीमा जाऔं । माननीय सदस्यहरू बसौं । बैठकलाई सञ्चालन गर्न सहयोग गर्नुहोस् । भोलि पनि समय छ । कार्यसूचीअन्तर्गत् अघि बढौं । माननीय सदस्यज्यू बोल्नकै लागि हो यो सभा । तर, प्रणाली पद्यती मानौं । प्रत्येकले एक एक मिनेट बोल्दा पनि निकै समय खर्च हुन्छ । ’