राजविराज : सप्तरीमा बीमा रकम हत्याउन भएको एक युवकको हत्यामा संलग्न रहेको आरोपमा बीमा अभिकर्ता र कर्मचारी पुर्पक्षका लागि कारागारमा थुनामा परेका छन् । उक्त घटनामा बीमा कम्पनीकी शाखा प्रमुख र मनी ट्रान्सफरका सञ्चालकसँग अदालतले पाँच/पाँच लाख रुपियाँ धरौटी मागेको छ ।
जिल्ला न्यायाधीश श्यामविहारी मौर्यको इजलाशले सप्तरीको कञ्चनरुप नगरपालिका–९ निवासी एनआइसी एशिया लघुबित्तमा कार्यरत रही सिटिजन लाइफ इन्स्युरेन्सका बीमा अभिकर्ता श्रवण सरवरिया र सोही इन्स्युरेन्समा कार्यरत सप्तरीको खडक नगरपालिका–३ बनरझुलाका सुर्यनारायण चौधरीलाई बिहीबार कारागारमा पठाएको सप्तरी जिल्ला अदालतले जनाएको छ ।
उक्त घटनामा सिरहाको लहान नगरपालिका–६ निवासी नेपाल लाइफ इन्स्योरेन्स शाखा कार्यालय कञ्चनरुपकी प्रमुख रीताकुमारी साह र कञ्चनरुप नगरपालिका–२ बदगामा निवासी तेजमनी ट्रान्सफर एण्ड ट्रेडर्सका सञ्चालक एवम् नेपाल लाइफ इन्स्योरेन्सका विमा अभिकर्ता शंकरकुमार गुप्तासँग अदालतले जनही पाँच लाख रुपियाँ धरौटी मागेको छ ।
अदालतका सूचना अधिकारी भरतमणि पोखरेलका अनुसार उक्त हत्या घटनामा तीन जना यसअघिदेखि नै पुर्पक्षका लागि कारागारमा थुनामा छन् । कञ्चनरुप नगरपालिका–३ का ३७ वर्षीय शिवशंकार दासको हत्या आरोपमा निजकी श्रीमती ३० वर्षीया कोशिलादेबी दास, भाउजु नाताकी शान्तिदेबी दास र बुहारी पर्ने हिरणदेबी दास गत वैशाख ११ गतेदेखि थुनामा छन् । उनीहरु चैत १५ गते पक्राउ परेका थिए ।
घटना अनुसार करेन्ट लागेर कात्तिक ६ गते शिवशंकर दासको मृत्यु भएको भन्दै निजकी श्रीमती कोशिलादेबीले प्रहरीलाई खबर गरिन् । घटनास्थलमा पुगेको प्रहरीले पनि करेन्ट लागेर नै शिवशंकरको मृत्यु भएको भनेर विश्वास गर्यो । तर अनुसन्धानका क्रममा पाँच महिनापछि शिवशंकरको हत्या भएको रहस्य खुलेको इलाका प्रहरी कार्यालय कञ्चनरुपका प्रहरी नायव उपरीक्षक दिपक रायले बताए ।
अनुसन्धानका क्रममा बीमा रकम हत्याउन गरिएको हत्याको रहस्य खुलेपछि कारवाही प्रक्रिया अगाडि बढाइएको प्रनाउ रायले बताए । प्रहरीले उजुरी दर्ता गरेकै दिन मृतककी श्रीमती, भाउजु र बुहारीलाई चैत १५ गते पक्राउ गर्यो । प्रहरीका अनुसार आरोपितहरूले ऋण चुक्ता गर्न योजनाबद्ध तरिकाले शिवशंकरको हत्या गरेको बताए ।
आरोपितहरूको बयान अनुसार घरव्यवहार चलाउन दास दम्पतिले शान्तिदेबीसँग ऋण लिएका थिए । दाउरा बेचविखन तथा मजदुरी गरेर तीन सन्तानसहित पाँचजनाको परिवार पाल्दै आएका शिवशंकरले ऋण तिर्न सकिरहेका थिएनन् । शान्तिदेबीले ऋण चुक्ता गर्न दबाब दिँदै आएकी थिइन् । त्यसक्रममा शान्तिदेबीले नै कोशिलालाई बीमा गरी श्रीमानको हत्या गर्न सुझाएकी थिइन् ।
योजना अनुसार शान्तिदेबीले रकम उपलब्ध गराएपछि घटनाभन्दा दुई महिनाअघि शिवशंकरको नेपाल लाइफ इन्स्योरेन्स र सिटिजन लाइफ इन्स्योरेन्समा २०/२० लाख रुपियाँको बिमा गराइयो । शान्तिदेबीले नै ५ गते साँझ शिवशंकरलाई आफ्नो घरमा बोलाएर मदिरा खुवाएर पठाइन् । मदिराको नशामा मातेर भान्सा कोठामा सुतेका शिवशंकरलाई कोशिलाले बिजुलीको तार बेरेर करेन्ट लगाइन् । करेन्ट लगाउने बेला बुहारी हिरणदेबीले टर्च बालेर सहयोग गरेकी थिइन्।
प्रतिक्रिया दिनुहोस !
