विराटनगर : विराटनगरबाट लागूऔषध ब्राउन सुगरसहित शनिबार दिउँसो दुई जना पक्राउ परेका छन्।
पक्राउ पर्नेमा एक जना भारतीय बालक पनि छन्। प्रहरीका अनुसार विराटनगर महानगरपालिका-४ का २८ वर्षीय आशिषकुमार भगत र भारत अररिया जोगवनीका १२ वर्षीय बालकलाई पक्राउ गरिएको हो।
उनीहरूलाई विराटनगर-१६ दरैयाबाट दिउँसो सवा ४ बजेतिर पक्राउ गरिएको प्रहरीले जनाएको छ। पैदलयात्रामा रहेका उनीहरूलाई लागूऔषध ब्युरोको टोलीले नियन्त्रणमा लिएर खानतलासी गर्दा साथबाट ४.६० ग्राम ब्राउन सुगर फेला परेको थियो।
साथै लागूऔषध डाइलेक्स डीसी र नाइट्रोसन तथा १२ हजार रुपैयाँ नगदसमेत बरामद भएको प्रहरीले जनाएको छ। पक्राउ परेका दुवै जनालाई इलाका प्रहरी कार्यालय रानीमा राखेर थप अनुसन्धान सुरु गरिएको जानकारी प्रहरीले दिएको छ।
प्रतिक्रिया दिनुहोस !
