बागमती नदीबाट अवैधरुपमा ढुंगा निकासी, बन्द गर्न स्थानीयको माग
रौतहट : चन्द्रपुर नगरपालिका -१ स्थित बागमती नदी किनारमा सयौं घनमिटर ढुंगा उत्खनन गरेर भण्डार गरिएको छ । चन्द्रपुर नगरपालिकाले बागमती नदीमा ठेक्का हालसम्म लगाएको छैन ।
यस आर्थिक वर्षको अहिलेसम्म चन्द्रपुर नगरपालिकाले ठेक्का नलगाएपछि व्यवसायीहरूले अवैधरुपले ढुंगा उत्खनन गरेर भण्डार गरेका हुन् । नदी किनारमा थुपारिएको ढुंगा सम्बन्धित निकायले जफत गर्नुपर्ने स्थानीय बासिन्दाले माग गरेका छन् । अवैधरुपमा नदीबाट उत्खनन् गरेर बागमती किनारको दोभान सामुदायिक वन क्षेत्रमा भण्डार गरिएको ढुंगा संकलनकर्ताहरू र व्यवसायीले बिक्री वितरण समेत गर्दै आएको सरोकारवालाहरू बताउँछन् ।
चन्द्रपुर नगरपालिकाले बागमती नदीमा ठेक्का नलगाएको अवस्थामा ढुंगा संकलन गर्नु नियम विपरित भएको स्थानीयको गुनासो छ । ढुंगा तस्करहरूले बिक्री गर्न जिल्लाको दक्षिणी भेगमा लैजादा सर्लाहीस्थित बागमती नगरपालिकाको ढुंगा हो भन्दै लाने गरेका छन् ।
डिभिजन वन कार्यालय रौतहटका सहायक वन अधिकृत सुरेश महतोले नियम विपरित नदीबाट उत्खनन् गरी किनारमा संकलन गरेर राखेको ढुंगाको विषयमा अनुसन्धान भइरहेको जानकारी दिएका छन् ।