काठमाडौं : उदयपुर जिल्ला अदालतले दुई जना प्रतिवादीलाई जीवित रहेसम्म (जन्म कैद) कैद सजायको फैसला गरेको छ । त्रियुगा नगरपालिका -६ मोहनपुर कि १६ वर्षीया कृसला चौधरीको जबरजस्ती करणी गरि हत्या गरेको आरोपमा पक्राउ परेका सप्तरी जिल्ला सुरुङ्गा नगरपालिका -१ का २७ वर्षीय उचित लाल सदा र सोही ठाउँका २३ वर्षीय विषे भन्ने विषय सदालाई जीवित रहेसम्म (जन्म कैद) कैद सजायको फैसला सुनाइएको उदयपुर जिल्ला अदालतका सूचना अधिकारी बुद्धराज निरौलाले जानकारी दिए ।
सूचना अधिकारी निरौलाका अनुसार उनीहरुलाई जीवित रहेसम्म (जन्म कैद) कैद सजायको फैसला सँगै जनही तीन लाख पीडित परिवारलाई प्रतिवादीको सम्पतिबाट भराउने र तत्काल पीडित राहत कोषबाट दुई लाख पीडितको नजिकको हकदारलाई उपलब्ध गराउने फैसला भएको छ ।
२०७८ साल साउन १३ गते घरबाट बेपत्ता भएकी कृसलाको २०७८ साल साउन १९ उदयपुर जिल्ला त्रियुगा नगरपालिका -१ स्थित राजदेवी सामुदायिक वनको रातमाटे खहरे खोलामा शव भेटिएको थियो । मृतक कृसला चौधरीको बुबा प्रेम कुमार चौधरीले दिएको किटानी जाहेरीका आधारमा २०७८ साला भदौ २१ गते उदयपुर जिल्ला अदालतमा मुद्धा दायर भएको थियो ।
उदयपुर जिल्ला अदालतले यसअघि पनि छुट्टाछुट्टै प्रकृतिका दुई मुद्दाका प्रतिवादीलाई जीवित रहेसम्म (जन्म कैद) कैद हुने फैसला गरेको थियो ।