विराटनगर : मोरङको सुन्दरहरैँचामा १० वर्षीया बालिकामाथि पटकपटक बलात्कार गरिएको घटना बाहिर आएको छ । बालिकालाई बलात्कार गरेको आरोपमा सुन्दरहरैँचा नगरपालिका–१० का ५५ वर्षीय पदम मगर पक्राउ परेका छन् । इलाका प्रहरी कार्यालय विराटचोकबाट सइ (प्रहरी नायव निरीक्षक) नीरबहादुर खड्काको नेतृत्वमा खटिएको टोलीले बुधबार राति मगरलाई घरबाटै पक्राउ गरेको हो ।
प्रहरीका अनुसार धनकुटा घर भएकी बालिकाका अभिभावक मगरकै घरमा डेरा बस्दै आएका थिए । बुवा विदेशमा छन् । आमाले दोस्रो बिहे गरेर गएपछि बालिका हजुरबुवा र हजुरआमासँग बस्दै आएकी थिइन् ।
अभिभावकसँग आफ्नै घरमा डेरा बस्दै आएकी बालिकालाई मगरले पटकपटक बलात्कार गरेको प्रहरीको प्रारम्भिक अनुसन्धानबाट खुलेको छ । मोरङ प्रहरीका प्रवक्ता डीएसपी रन्जनकुमार दाहालका अनुसार मगरले पछिल्लो पटक मंगलबार बालिकालाई बलात्कार गरेको खुलेको छ ।
अभिभावक कोही पनि नभएको अवस्थामा शौचालयनजिकको खाली जग्गामा लगेर बलात्कार गरेको पाइएको दाहालले बताए । उनका अनुसार मुख थुनेर बोल्नसमेत नदिइकन र कसैलाई भनेमा कुटपिट गर्ने धम्की दिएर बलात्कार गरेको खुलेको छ ।
हातमा समातेर तान्दै गर्दा बालिकाकी हजुरआमाले बुधबार दिउँसो देखेपछि घटना बाहिर आएको हो । ‘मगरले हातमा समातेर तान्दै गर्दा बालिका चिच्याइछन् । त्यतिबेलै हजुरआमाले पनि देखेपछि घटना बाहिर आएको हो,’डीएसपी दाहालले भने,‘सोधीखोजी गर्दा यसअघि पनि पटकपटक बलात्कार गरेको बालिकाले बताएकी छन् । डर र त्रासका कारण बालिकाले घटनाका बारेमा अभिभावकलाई सुनाउन नसकेको पाइएको छ ।’
उनका अनुसार बालिकाले आफूलाई यसअघि पनि मगरले पटकपटक बलात्कार गरेको सुनाएकी थिइन् । बारम्बार बलात्कृत भएपछि बालिका उनको छेउछाउ जान नमान्ने तथा राति निद्रामा चिच्याउने,डराउने र तर्सिने गरेको जानकारी अभिभावकले प्रहरीलाई गराएका छन् ।
पीडित बालिकालाई उपचार तथा स्वास्थ्य परीक्षणका लागि धरान लगिएको छ। शरीरमा बाहिर देखिने चोटपटक भने नरहेको प्रहरीले जनाएको छ । इलाका प्रहरी कार्यालय बेलबारीका इन्सपेक्टर तेजबहादुर दाहाल नेतृत्वको टोलीले घटनाको अनुसन्धान अघि बढाएको छ ।
मगरविरुद्ध जबरजस्ती करणी मुद्दा चलाउन म्याद थप गरेर अनुसन्धानको बाँकी प्रक्रिया अघि बढाउने प्रहरीको तयारी छ ।
प्रतिक्रिया दिनुहोस !
