एसईई दिनेमा गोरखाका आठ विद्यालयबाट १० भन्दा कम परीक्षार्थी

गोरखा : बसाइँसराइका कारण ग्रामीण क्षेत्रको जनसंख्या घट्दै गएपछि यसको असर विद्यालयमा पनि देखिएको छ । बिहीबारबाट सुरु हुने यस वर्षको माध्यमिक शिक्षा परीक्षा (एसईई)मा विभिन्न गाउँका विद्यालयबाट १० जनाभन्दा कम परीक्षार्थी सहभागी हुँदैछन् ।

शिक्षा विकास तथा समन्वय इकाइ गोरखाका अनुसार जिल्लाभरबाट एसईईमा गोरखाका तीनहजार छसय ६२ जना परीक्षार्थी सहभागी हुँदैछन् । उनीहरूमध्ये एकहजार नौ सय सय १३ जना छात्रा र एकहजार सातसय ४९ जना छात्र हुन् । 

सबैभन्दा कम सिरानचोक ५ मा रहेको चित्रेपोखरी माध्यमिक विद्यालयबाट चारजना परीक्षार्थी यो एसईईमा सहभागी हुँदैछन् । त्यस्तै सहिद लखन गाउँपालिका ६ बतासेको भगवती हिमालय मावि घैरुङ र गोरखा नगरपालिका ३ को राष्ट्रिय मावि घलाङबाट छ/छ जना एवं गोरखा नगरपालिका ८ को रत्नलक्ष्मी मावि डुम्रीडाँडाबाट सातजना परीक्षार्थीहरु एसईईमा सहभागी भएका शिक्षा विकास तथा समन्वय इकाइका प्रमुख सुवास आचार्यले जानकारी दिए । 

त्यस्तै चारवटा बोर्डिङ स्कूलबाट पनि १० भन्दा कम विद्यार्थी एसईईमा सहभागी भएको कार्यालयले जनाएको छ । बोर्डिङतर्फ गोरखा नगरपालिकाको मनकामना बोर्डिङ स्कुलबाट छजना, सूर्यमुखी बोर्डिङ स्कुलबाट आठजना,जेनियस बोर्डिङ स्कुलबाट आठजना र पालुङटार नगरपालिका ठाटीपोखरीको बालज्योती इङ्लिस बोर्डिङ स्कुलबाट नौजना विद्यार्थीहरु एसईईमा सहभागी हुँदै छन् । 

गोरखा नगरपालिका ८ आहालेस्थित सरस्वती माविले सबैभन्दा धेरै एकसय २७ जना परीक्षार्थीहरू एसईईमा सहभागी गराएको छ । बोर्डिङतर्फ गोनपा ८ रानीवनको दि ओल्ड क्यापिटल मावि रानीवनले ९४ जना विद्यार्थीहरु सहभागी गराएको छ । 

एसईईको सम्पूर्ण तयारी पूरा भइसकेको इकाइ प्रमुख आचार्यले जानकारी दिए । परीक्षा केन्द्र, केन्द्राध्यक्ष निर्धारण भइसकेका छन् भने प्रश्नपत्र तथा उत्तर पुस्तिका सबै केन्द्रमा पठाउने काम भइसकेको इकाइ प्रमुख आचार्यले जानकारी दिए ।

यस वर्षको एसईईमा साधारणतर्फ ३५ सय २७ जना, प्राविधिक तर्फ १ सय १ र गे्रडवृद्धितर्फ ३४ जना परीक्षार्थी सहभागी भएका छन्। जिल्लाका तीन विद्यालयहरु भवानी मावि मान्वु, त्रिवेणी मावि सेरा र ज्ञानमार्ग मावि घ्याल्चोकबाट एकसय एकजना विद्यार्थीहरूले प्राविधिकतर्फको एसईई परीक्षा दिने कार्यालयले जनाएको छ  । 

एसईईको लागि कार्यालयले आवश्यकता अनुसार सुरक्षाकर्मी सहित तीनसय ९३ जना कर्मचारी परिचालन गरेको छ । 

१६ जना बहिरा र पाँचजना दृष्टिविहीन एसईई दिँदै

गोरखाबाट यस वर्ष १६ जना बहिरा र पाँचजना दृष्टिविहिन परीक्षार्थी इसईईमा सहभागी हुँदैछन् । आरुघाट गाउँपालिका ३ स्थित जलकुमारी माविबाट चारजना र गोनपा ८ स्थित सरस्वती मावि आहालेबाट १ गरी ५ जना दृष्टिविहिन परीक्षार्थी एसईईमा सहभागी हुने भएका हुन् । गोरखा नगरपालिका १० टक्सारस्थित मनकामना बहिरा माविबाट १६ जना बहिरा विद्यार्थीहरु पनि एसईईमामा सहभागी हुने आचार्यले जानकारी दिए । 

पालिकाभरि एसईई परीक्षा केन्द्र छैन

गोरखाको हिमालपारि रहेको चुमनुब्री गाउँपालिकामा एउटा पनि परीक्षाकेन्द्र छैन । दुईवटा मात्र माध्यमिक तहका विद्यालय रहेको सो पालिकामा एउटै पनि परीक्षाकेन्द्र नरहेको हो । सो पालिकाबाट ५६ जना परीक्षार्थीहरु एसईई दिनका लागि धार्चे गाउँपालिकाको माछाखोला परीक्षाकेन्द्र पुगेका छन् । चुमनुब्री २ को ल्हो मावि र चुमनुब्री ३ को वुद्ध माविका विद्यार्थीहरु परीक्षा दिन माछाखोला पुगेका वुद्ध माविकी प्रधानाध्यापक पार्वता देवकोटाले जानकारी दिइन् ।

उनीहरु बुधबार माछाखोला आइपुगेका हुन् । उनीहरुलाई परीक्षा अवधिभरका लागि होटलहरुमा राखिएको छ । सबैभन्दा धेरै गोरखा नगरपालिकामा छन् । त्यहाँ ६ वटा परीक्षा केन्द्रहरु तोकिएको छ । चुमनुब्रीमा परीक्षार्थी सङ्ख्या कम रहेका कारण चुमनुब्रीमा परीक्षा केन्द्र नराखिएको कार्यालयले जनाएको छ । 

एसईई परीक्षाको सम्पुर्ण पूर्वतयारीहरु सम्पन्न भइसकेको शिक्षा विकास तथा समन्वय इकाइ कार्यालय गोरखाका प्रमुख सुवास आचार्यले बताए । ‘प्रश्नपत्रहरु केन्द्र नजिकको प्रहरी चौकीमा पुगिसक्यो’,उनले भने, ‘केन्द्राध्यक्ष तोकेर उत्तर पुस्तिकाहरु पनि सबै केन्द्रमा पुर्‍याइसक्यौँ ।’ 

कार्यालय जिल्लाभर २३ वटा परिक्षा केन्द्र तोकेको छ । कार्यालय गत चैत ९ गते २३ वटै केन्द्रका केन्द्राध्यक्षहरुलाई अभिमुखीकरण समेत गराइ सकेको छ ।