नवलपरासीका सीमा नाकामा सुरक्षा चेकजाँच कमजोर, के भन्छन् प्रदेश प्रहरी प्रमुख ?
साउन ६, २०८३ बुधबार १३:६:५
परासी : नवलपरासीको नेपाल–भारत सीमा नाकामा सशस्त्र र नेपाल प्रहरीको निगरानी तथा चेकजाँच प्रभावकारी हुन नसकेको देखिएको छ । सुरक्षा निगरानी कमजोर हुँदा सीमा नाकाबाट हुने अवैध सामान तथा लागुऔषध ओसारपसार नियन्त्रणमा चुनौती थपिएको छ । यसको पछिल्लो उदाहरणका रुपमा नेपालबाट भारतर्फ लैजाँदै गरेको ५ किलोग्राम लागुऔषध अफिम पाँच दिनअघि नवलपरासीको भुजहजा नाकास्थित भारतीय लक्ष्मीपुरबाट भारतीय सुरक्षाकर्मीहरुले बरामद गर्नु रहेको छ ।
ठूला परिमाणको अफिम बरामद भएकोबारे नवलपरासीको नेपाल प्रहरी र सशस्त्र प्रहरी अनभिज्ञ देखिनुले सीमा सुरक्षाको व्यवस्थामाथि गम्भीर प्रश्न उठाएको छ । अफिम दशगजाबाट करिब तीन सय मिटर भारतीय क्षेत्रमा बिहानै बरामद हुनुले सीमा क्षेत्रमा खटिएका नेपाल प्रहरी र सशस्त्र प्रहरीको निगरानी प्रभावकारी नभएको देखिएको हो । यसले सीमा क्षेत्रमा रहेका दुई सुरक्षा निकायका युनिटमाथि नै प्रश्न उठ्न थालेको छ ।
पाल्हीनन्दन गाउँपालिका– ५ को चिमनटोलादेखि सुस्ता गाउँपालिका–५ को सकरदिनसम्मको करिब २८ किलोमिटर सीमा क्षेत्रमा पछिल्लो समय अवैध गतिविधि बढ्दै गएको गुनासो स्थानीयले गर्दै आएका छन् । नेपालबाट भारततर्फ अवैध रुपमा खरबुजा र फर्सीका बीउ निकासी हुने तथा भन्सार छलेर कपडा, चिनी, कुखुरा, मोबाइलका पार्टस समेत ओसारपसार हुने क्रम बढेको उनीहरुको भनाई छ ।
नेपालबाट गएको अफिम भारतमा बरामद मात्र होइन जिल्लाका विभिन्न नाकाबाट अवैधरुपमा भन्सार छली गरेर लगिएका सामान पूर्वी नवलपरासीसहित अन्य जिल्लाबाट बरामद हुनुले पनि सीमामा रहेका सशस्त्र र नेपाल प्रहरीमाथि आशंका उठ्न थालेको स्थानीयको भनाई छ । प्रहरीले भारतबाट भित्र्याइएका स–साना सामान र लागुऔषध दैनिकजसो बरामद गरेको छ तर ठूलो परिमाणका सामान भने बरामद गरेको देखिएको छैन ।
खरबुजा र फर्सीको बीउ भारततर्फ अवैध निकासी भइरहेको विषयमा जिल्ला प्रहरी कार्यालयका प्रमुख (एसपी) रामबहादुर केसी तथा सशस्त्र प्रहरी बल नेपाल नम्बर २६ गणका प्रमुख (एसपी) गोविन्द खातीले केहीले बोरा र झोलामा लैजाने गरेको जानकारी पाएको बताउँदै त्यसको नियन्त्रणका लागि निगरानी बढाइएको बताएका छन् । ‘केही दिन अघिसम्म फाट्टफुट्ट भएको बारे जानकारी पाएका थियौं । अहिले भने निगरानी बढाएपछि नियन्त्रणमा आएको छ । ’ उनीहरुको भनाई छ । सीमा नाकामा निगरानी र चेकजाँचलाई बढाएकाले ठूलो परिमाणमा अवैध सामान नभित्रिएको उनीहरुको दाबी छ ।
भूपेन्द्रबहादुर खत्री
डिआइजी, लुम्बिनी प्रदेश प्रहरी कार्यालय
नवलपरासी पनि खुला सीमाना भएको जिल्ला हो । खुला सीमानाको गलत फाइदा उठाउँदै कहिले काँही निगरानी बढाउँदा बढाउँदै पनि अवैध सामान भित्रिन सक्छन् । अवैध कार्य र अपराध नियन्त्रणमा त्यहाँका स्थानीयको सहयोग महत्वपूर्ण हुन्छ । स्थानीयलाई अझ बढी त्यस क्षेत्रको अवस्थाका बारेमा बढी जानकारी हुने भएकाले प्रहरीले उनीहरुको मन जित्ने गरी काम गर्नुपर्छ र त्यसका लागि हामीले समुदायसम्म पुग्ने गरेका छौं ।
पछिल्लो समय नवलपरासीबाट खरबुजा, फर्सीको बीउ जस्ता सामानको अवैध ओसारपसारबारे त्यहाँको युनिटले नै हेरेको होला । तेस्रो मुलकहरुबाट आउने भएकाले कहिले काँही बिल बिजकले कानुनी समस्या उत्पन्न गराउने भएकाले नियन्त्रणमा समस्या आउने गरेको छ । प्रहरी युनिटमा पनि केही गलत मनसायका व्यक्ति हुन सक्छन् ।
हाम्रै प्रहरीका केही व्यक्तिका कारण बदमासी हुन पनि सक्छ । त्यसैले सीमा नाकाबाट हुने अवैध कार्यलाई नियतवश मिलमतो गरी लाभ लिने उद्देश्यले कुनै पनि दर्जाको प्रहरीको मिलमतो भएको पाइएमा तत्काल कारबाही हुन्छ । नवलपरासीमा पनि त्यस्ता गलत तरिकाले लाभ लिनेलाई कारबाही भएका छन् । लागुऔषधसहित अवैध गतिविधि नियन्त्रणका लागि इन्स्पेक्टरको नेतृत्वमा प्रदेशस्तरीय प्रहरी परिचालन इकाई (पिआइयू) समेत सक्रिय रुपमा परिचालित छ र त्यसले निगरानीलाई थप प्रभावकारी बनाइरहेको छ ।
दीपक अधिकारी
डिआइजी, स.प्र.बल नेपाल नं.५ बिन्ध्यावासिनी बाहिनी मुख्यालय रुपन्देही
नवलपरासी जिल्लामा हुने सबै प्रकारका अवैध कारोबार र गतिविधि नियन्त्रण गर्नु हाम्रो प्रमुख प्राथमिकता हो । यसका लागि मैले जिल्लाको गण र मातहतका सबै युनिटलाई उच्च सतर्कताका साथ लाग्न भनेको भन्यै छु र सोहीअनुरुप परिचालन पनि गरिएको छ । विशेष गरी पछिल्लो समय फर्सी र खरबुजाको बिउको अवैध ओसारपसारले चुनौती त थपेको छ ।
यसले टाउको नै दुःखाएको छ । यसको नियन्त्रणका लागि दिउँसो र रातभरी ड्युटी खटाइएको छ । कति बेला लैजान्छन् हैरान भो । त्यसमा पनि तस्करहरुले समय र अवसरको फाइदा उठाएर विभिन्न बाटो हुँदै सुरक्षाकर्मीलाई छलेर लैजाने प्रयास गर्ने गरेका छन् । त्यसमा पनि हाम्रो निगरानी भइरहेको छ । खुला सीमाका कारण केही समस्या भए पनि हामीले गर्न सक्ने गरेका छौं ।
अवैध कारोबार नियन्त्रणमा सुरक्षाकर्मीको प्रयास मात्र पर्याप्त हुँदैन । स्थानीयबासी, नागरिक समाज, पत्रकार सबै सरोकारवालाको सक्रिय सहयोग उत्तिकै आवश्यक छ । यस्ता शंकास्पद गतिविधिबारे समयमा सूचना पाउन सके नियन्त्रणमा सहज हुने थियो । त्यसैले अवैध कारोबार र गतिविधिसम्बन्धी कुनै सूचना भए सबैले जानकारी दिएर सहयोग गर्न अनुरोध गर्दछु ।
प्रतिक्रिया दिनुहोस !
